धावत्या रेल्वेतील महिलेच्या प्रसूतीसाठी पोलिसांची धावपळ

इगतपुरी शहर (जि. नाशिक) : सध्या कोरोना (Coronavirus) महामारीमुळे देशभरात मृत्यूचे तांडव सुरु आहे या कठीण काळात बरेच जण स्वतःचा जीव धोक्यात घालून इतरांना मदत करताना दिसत आहेत. दरम्यान मुंबई-देवगिरी एक्स्प्रेसमधून (Mumbai - Devgiri Express) प्रवास करणाऱ्या महिलेच्या प्रसूतीसाठी इगतपुरी रेल्वे पोलिसांनी वेळीच धावपळ केल्याने महिलेची सुखरूप प्रसूती झाल्याची घटना समोर आली आहे. बाळ व आई सुखरूप असल्याची माहिती सहाय्यक निरीक्षक सुधीर पाटील यांनी दिली. (woman gave birth safely after the railway police helped her)

या कठीण प्रसंगात रेल्वे पोलिसांनी केलेली धावपळ पाहून माणुसकीचा झरा अजून जिवंत असल्याचे बोलले जात आहे. महिला आणि नवजात बाळ सुरक्षित असून घोटी ग्रामीण रुग्णालयात उपचार करण्यात आले.

काय घडले?

रविवारी (ता.३०) रात्री परभणी येथे राहणारे कैलास पवार हे आपली गरोदर पत्नी रेखा पवार यांच्यासह मुंबई देवगिरी एक्स्प्रेसने मूळ गावी परभणी येथे जात होते. मध्यरात्री इगतपुरी रेल्वे स्थानकात रेखा पवार यांना अचानक प्रसूती कळा सुरु झाल्या. वेदना असह्य होत असल्याची बाब रेल्वे सुरक्षा बलाचे सत्यसुधन त्रिपाठी व सचिन नागदेवते, प्रमोद आहाके, सतीश खर्डे यांनी समजली. त्यांनी तातडीने रेखा पवार यांना सरकारी वाहनाने इगतपुरी ग्रामीण रुग्णालयात दाखल केले. मात्र येथे कोविड सेंटर असल्याने तेथे प्राथमिक उपचार करून त्यांना घोटी येथील ग्रामीण रुग्णालयात दाखल केले. येथे प्रसूती सुखरूप झाली.
. (woman gave birth safely after the railway police helped her)