Navratri Festival 2023 : नवरंगांच्या साड्यांची वाढती क्रेझ! बंदेश पॅटर्नला पसंती

Navratri Festival 2023 : नवरात्रोत्सवात गरबा, दांडिया खेळाबरोबरच नऊ दिवसांमधील नवरंग साड्या, कुर्ता पेहरावाची क्रेझ आहे. त्या दिवसातील रंग आपल्याकडे असावेत यासाठी तरुणांसह महिलांनी खरेदीला प्राधान्य दिले असून महिलांची साड्यांमधील बंदेश पॅटर्नला, तरुणांची कुर्ता- पायजमा, तरुणींची घागऱ्याला विशेष पसंती मिळत आहे.

गणेशोत्सवानंतर सगळ्यांनाच नवरात्रोत्सवाचे वेध लागले आहे. १५ ऑक्टोबरला घटस्थापनेपासून नवरात्रोत्सवाला सुरवात होत आहे. (women preferring bandesh pattern saree for navratri nashik news)

नवरात्रोत्सवात नवरंगांना विशेष महत्त्व आहे. पिवळा, हिरवा, राखाडी, नारंगी, पांढरा, लाल, रॉयल ब्लू, गुलाबी, जांभळा आदी नऊ रंगांच्या साड्या, कुर्त्याला मागणी वाढली आहे.

बाजारात विशेष करून जोडप्यांसाठी कुर्ता व घागऱ्याचे नवनवीन पॅटर्न आले आहेत. दररोज वेगळा ड्रेसकोड असावा याकडे तरुणांसह महिलांचा कल असतो, त्याप्रमाणे खरेदी होत असून या खरेदीतून कापड बाजारात मोठी उलाढाल होत आहे. दरम्यान, शहरातील विविध भागातील ड्रेपरींकडून चनिया चोळी भाडेतत्वावर मिळत असल्याने चनिया चोळीच्या मागणीत मोठी घट झाली आहे, त्यामुळे कापड व्यावसायिकांनी नवरंग असलेल्या साड्या, घागरा, कुर्ता-पायजमा यावर भर दिला आहे.

खरेदीकडे कल

नवरात्रोत्सवाला अवघा एक आठवडा असल्याने महिलांनी विविध पॅटर्नच्या साडी खरेदीस प्राधान्य दिले असून विविध रंगांच्या साड्या महिलांकडून खरेदी केल्या जात आहे. महिलांकडून नवरात्रोत्सवाबरोबरच दसरा, दिवाळीची खरेदी आताच केली जात असल्याचे दिसत आहे.

वर्क असलेल्या बंदेज, लेटिया, ब्राइट कलरमधील साड्यांना मागणी आहे. गरबा नृत्य, दांडिया खेळण्यासाठी चनिया चोली, घागरा पुरुषांसाठी कुर्ता, पायजमा आदींचे विविध पॅटर्न दालनांमध्ये उपलब्ध असून पंधराशे पासून पुढे किमती आहे. जोडप्यासाठी मॅचिंग असलेल्या कुर्ता-घागर्याला पसंती आहे.

"नवरात्रोत्सवात कापड बाजारात महिला व जोडप्यांसाठी विशेष कलेक्शन आले आहेत. वर्क असलेल्या नवरंग असलेल्या बंदेज, लेटिया साड्यांना महिलांची पसंती आहे. तरुणांची कुर्ता-पायजमा, तरुणींची घागऱ्याला पसंती आहे." - नरेश पारख, अध्यक्ष, नाशिक रिटेल क्लॉथ मर्चंट असोसिएशन