मालकाच्या गल्ल्यावर ठेवला डोळा!...अन् गेला बाराच्या भावात

नाशिक : गेल्या महिन्यात पंचवटीतील दत्तनगरमध्ये किराणा दुकानाचा पत्रा उचकटून झालेल्या घरफोडीप्रकरणी पंचवटी पोलिसांनी दुकानातीलच कामगाराला अटक केली. दुकानात काम करणाऱ्या कामगारानेच रात्री घरफोडी करीत 25 हजारांवर डल्ला मारल्याची कबुली दिली. या प्रकरणी पंचवटी पोलिसांत घरफोडीचा गुन्हा दाखल आहे. 

अशी आहे घटना

राहुल तुरे (रा. शेषराव महाराज चौक, फुलेनगर, पंचवटी) असे संशयित चोरट्याचे नाव आहे. दर्शन लुणावत (रा. दत्तनगर, पंचवटी) यांचे दत्त मंदिरासमोर किराणा दुकान आहे. 20 फेब्रुवारीच्या मध्यरात्री त्यांच्या दुकानाच्या पाठीमागील पत्रा उचकटून संशयित चोरट्याने गल्ल्यातील 25 हजारांची चोरी केली होती. वरिष्ठ पोलिस निरीक्षक अशोक भगत यांच्या मार्गदर्शनाखाली फुलेनगर चौकीचे सहाय्यक पोलिस निरीक्षक मनोज शिंदे तपास करीत होते. चोरी झाल्यापासून दुकानात कामाला येणारा संशयित राहुल तुरे कामावर येत नसल्याचे तपासातून समोर आले. त्यामुळे पोलिसांनी त्याचा शोध सुरू केला. हवालदार विकास देशमुख, शेषराज केदारे, दशरथ निंबाळकर, सचिन म्हसदे, श्रीकांत कर्पे यांचे पथक फुलेनगरमध्ये संशयित तुरेचा शोध घेत त्याच्या घरी पोहचले.

हेही वाचा > दुष्काळी मातीतील द्राक्षांचा गोडवा परदेशात!...'या' तालुक्‍यातून तीन हजार टन द्राक्षांची निर्यात...

पोलिसांना पाहून संशयित तुरेने घरातून पळ काढला. पाठलाग करीत त्याला अटक करण्यात आली. पोलिसी खाक्‍या दाखविल्यानंतर संशयित तुरेने घरफोडीची कबुली दिली. चोरी केलेली 25 हजारांची रक्कमही जप्त करण्यात आली.  

हेही वाचा > आता 'पार्किंग'साठी नो टेन्शन!...घरबसल्या पार्किंगच्या जागेची निवड...