Smallest Portrait Rangoli: महाराजांची जगातील सर्वात लहान पोर्ट्रेट रांगोळी!

गणूर (जि. नाशिक) : छत्रपती शिवाजी महाराजांची जयंती (Jayanti) रविवारी (ता.१८) राज्यासह संपूर्ण देश व अनेक राष्ट्रांमध्ये मोठ्या उत्साहात साजरी होत असताना महाराजांना अनोखं,

अविश्वसनीय अभिवादन केले आहे ते चांदवड (जि.नाशिक) येथील कलाशिक्षक देव हिरे यांनी. (Worlds Smallest Portrait Rangoli of Maharaja by Art teacher Dev Hire nashik news)

अवघ्या अडीच बाय अडीच सेंटिमीटरवर त्यांनी छत्रपती शिवाजी महाराजांची पोट्रेट रांगोळी काढत एका नव्या विक्रमाला गवसणी घातली आहे. ही रांगोळी म्हणजे छत्रपती शिवाजी महाराजांची जगातील सर्वात लहान आकारातील लहान पोर्टेट रांगोळी असल्याचा दावा केला जात असून यामुळे कलेची तपश्चर्या सिद्ध करणारा हा नवा विक्रम ठरला आहे.

श्री. हिरे हे शिक्षण मंडळ भगूर, संचालित नूतन माध्यमिक विद्यालय भाटगाव (ता. चांदवड जि. नाशिक) शाळेत कलाशिक्षक असून आपल्या कलेच्या माध्यमातून सर्वत्र प्रसिद्ध आहे. शिवजयंती निमित्त महाराजांना काहीतरी वेगळ्या पद्धतीने अभिवादन करावे या प्रेरणेने (२.५ सें. मी × २.५ सें. मी.) आकारात ड्रॉइंग पेपर वर हातांच्या बोटांच्या साहाय्याने ५७ मिनिटात ही अनोखी शिवरायांची प्रतिमा रंगोळीमध्ये साकारली आहे.

हेही वाचा : हिंडेनबर्ग अहवालाचा फटका भाजपला भविष्यात बसणार?

इतक्या लहान आकारात छत्रपती शिवाजी महाराजांची रांगोळी साकारणारे श्री. हिरे हे पहिले कलाकार आहेत. विविध पुरस्काराने सन्मानित देव हिरे या नावाने प्रसिद्ध असलेले नेहमीच विविध विषयांवर आपल्या फलक रेखाटन, रांगोळी, चित्र, स्केच या कलेतून विविध प्रयोग करत असतात. या रेकॉर्ड ब्रेक ,अद्भुत सर्वात लहान पोर्ट्रेट रांगोळी ने त्यांच्या प्रयोगात अजून एक भर घातली आहे.

"महाराजांना अनोख्या पद्धतीने अभिवादन करण्याचा माझा मानस होता. या आधी नोंदवलेले रांगोळी प्रकारातील सर्व विक्रमांचा अभ्यास केला असता ३ सेमीच्या खाली कुणीही रांगोळी काढली नसल्याचे समोर आले आहे.

म्हणून मी हा प्रयोग करण्याचे ठरवलं. ५७ मिनिटात पूर्ण झालेल्या या कलाकृतीसाठी रांगोळीचे ३ रंग वापरले आहेत. महाराजांना केलेलं अनोखं अभिवादन बघून कलाक्षेत्रातील अनेकांच्या प्रेरणादायी प्रतिक्रिया येत आहेत." - देविदास हिरे, कलाशिक्षक