Nashik ZP News : जि. प. अभियंता पतसंस्थेची निवडणूक बिनविरोध

Nashik ZP News : जिल्हा परिषद अभियंता सहकारी पतसंस्थेची २०२३ ते २०२८ ही पंचवार्षिक निवडणूक गुरुवारी बिनविरोध पार पडली. संचालक मंडळाच्या ११ जागांसाठी ११ उमेदवारांचे अर्ज शिल्लक राहिल्याने निवडणूक अधिकारी शैलेश पोतदार यांनी ११ उमेदवारांची बिनविरोध निवड झाल्याचे जाहीर केले.

यामुळे पतसंस्थेची बिनविरोधची परंपरा कायम राहिली. (ZP Election of Engineers Credit Union unopposed nashik news)

जिल्हा परिषदेतील अभियंत्यांची आर्थिक वाहिनी असलेल्या जिल्हा परिषद अभियंता सहकारी पतसंस्थेची व्यवस्थापक समितीच्या २०२३ ते २०२८ या कालावधीसाठीची पंचवार्षिक निवडणूक प्रक्रिया सुरू होती. ११ जागांसाठी १७ उमेदवारांनी अर्ज दाखल केले होते.

त्यावर, जिल्हा परिषद अभियंता संघटनेचे माजी अध्यक्ष रावसाहेब पाटील, रावसाहेब बाविस्कर, सचिव जितेंद्र पाटील, नितीन पाटील यांनी निवडणूक अर्ज दाखल उमेदवारांची बैठक घेतली. यात, पतसंस्थेची निवडणूक बिनविरोध होत असल्याची परंपरा असल्याचे सांगत ही परंपरा कायम ठेवण्याचे आवाहन उमेदवारांना केले.

त्यानंतर, माघारीच्या अंतिम दिवशी दाखल झालेल्या १७ पैकी सहा उमेदवारांनी अर्ज मागे घेतले. त्यामुळे ११ जागांसाठी ११ उमेदवार रिंगणात राहिले.

यात सर्वसाधारण गटातून सुरेश देशमुख, इग्नेशियस मकासरे, नामदेव भोये, अविनाश बुरकुले, देवेश बच्छाव, सचिन उगले, अनुसूचित जाती-जमाती गटातून सुभाष अहिरे, इतर मागासवर्गीय प्रवर्गातून राहुल महाजन, विमुक्त जाती-जमाती प्रवर्गातून मुकेश गुंजाळ, महिला राखीव गटातून राखी देवरे, पूनम शिंदे यांचे अर्ज शिल्लक राहिल्याने निवडणूक अधिकारी पोतदार यांनी या उमेदवारांची बिनविरोध निवड झाल्याचे जाहीर केले. बिनविरोध निवड झाल्यावर अभियंत्यांनी जल्लोष साजरा केला.