Dhule Crime News : पेट्रोलचोरीच्या वादातून दोन गटांत दंगल; पोलिसांचे पथसंचलन

शिरपूर : पेट्रोल चोरल्याच्या वादातून दोन गटांत तुफान दगडफेक होऊन दंगल उसळल्याची घटना रविवारी (ता. १४) रात्री साडेदहाला शहरातील कुंभारटेक व मदिना मोहल्ला परिसरात घडली.

दगडफेकीत दोन जण जखमी झाले.

दोन्ही गटांनी दिलेल्या फिर्यादीवरून सुमारे २६ संशयितांविरोधात गुन्हा दाखल करण्यात आला. घटनेचे गांभीर्य लक्षात घेऊन सोमवारी (ता. १५) पोलिसांनी शहरातून पथसंचलन केले.

रवींद्र बाबूलाल बडगुजर (वय ४९, रा. कुंभारटेक) यांनी दिलेल्या फिर्यादीनुसार, त्यांच्या दुचाकीमधून पेट्रोल कोणी चोरले याबाबत विचारपूस केल्याचा राग आल्याने संशयितांनी मारहाण सुरू केली. त्यामुळे ते घराकडे परत जाऊ लागले.

संशयितांनी दगडविटांचा मारा केला. या घटनेत डोक्याला दगड लागून विष्णू महादू वाणी जखमी झाले. संशयित तौफिक शेख, आकिब शेख, बाबा मन्सुरी, अबुझार शेख, दानिश बागवान, नदीम शेख, मुस्तकिम शेख, शाहिद शेख, सईद पिंजारी, सादिक पिंजारी, सलमान पिंजारी.

सादिक शेख, अजहर शेख, अकिब जावेद, नविद शेख, ऐहतेशाम शेख, इमरान शेख, साहिल शेख व अन्य १५ ते २० संशयित (सर्व रा. मदिना मोहल्ला) यांच्याविरोधात शहर पोलिस ठाण्यात गुन्हा दाखल करण्यात आला.

याच प्रकरणात शहनाज खलील शेख (३५, रा. मदिना मोहल्ला) हिने दिलेल्या फिर्यादीनुसार, पेट्रोलचोरीबाबत संशयितांनी मारहाण व दगडफेक केल्याने तिचा दीर नदीम शेख जखमी झाला.

संशयित रवींद्र बडगुजर, विनोद कुंभार, विजू कुंभार, अतुल माळी, अक्षय चौधरी, कमलेश चौधरी, बंटी महाजन, गोपाल माळी व अन्य पाच ते दहा जण (सर्व रा. माळी गल्ली, शिरपूर) यांच्याविरोधात पोलिसांनी गुन्हा दाखल केला.

पोलिसांचे पथसंचलन

दरम्यान, संक्रांतीच्या पूर्वसंध्येला दंगल झाल्याने पोलिसांनी परिसरात मोठा बंदोबस्त तैनात केला. सोमवारी सायंकाळी दंगलग्रस्त भागासह परिसरातून अपर अधीक्षक किशोर काळे, उपविभागीय पोलिस अधिकारी सचिन हिरे, निरीक्षक अन्साराम आगरकर.

सांगवीचे सहाय्यक निरीक्षक सुरेश शिरसाट यांच्या नेतृत्वाखाली पथसंचलन करण्यात आले. संशयितांची धरपकड सुरू असून, परिस्थिती नियंत्रणात आहे, असे पोलिसांतर्फे सांगण्यात आले. जनतेने अफवांवर विश्वास ठेवू नये, असे आवाहन केले.