Dhule News : शहराला सुरळीत पाणीपुरवठा करणाऱ्या संपूर्ण व्यवस्थेलाच ग्रहण लागले आहे की काय, असे म्हणण्याची वेळ आली आहे. गेल्या दोन-तीन दिवसांपासून अक्कलपाडा पाणीपुरवठा योजनेवरील जलवाहिनी फुटल्याने देवपूर भागाचा पाणीपुरवठा विस्कळित झाला.
हे कमी की काय मंगळवारी (ता. ३) तापी पाणीपुरवठा योजनेवरील व्हॉल्व्ह फाटल्याने योजनेवरील पाणीपुरवठा बंद करावा लागला. दरम्यान, रात्रीच दुरुस्ती पूर्ण होईल, असा विश्‍वास महापालिकेच्या अभियंत्यांनी व्यक्त केला. (valve on tapi water supply scheme burst dhule news)
शहराला पाणीपुरवठा करणाऱ्या तापी योजनेवर वर्षभर विविध तांत्रिक अडचणींचा सामना असतो. पाइपलाइन जुनी झाल्याने कधी, कुठे पाइपलाइन फुटेल हे सांगता येत नाही. अनेक ठिकाणी गळत्याही लागलेल्या असतात. त्यामुळे शहराचा पाणीपुरवठा विस्कळित होतो.
दरम्यान, अक्कलपाडा पाणीपुरवठा योजना कार्यान्वित झाल्यानंतर शहरवासीयांना रोज पाणीपुरवठा होईल असे स्वप्न दाखविले गेले आहे. मात्र, अद्याप ही योजना पूर्ण क्षमतेने कार्यान्वित झालेली नाही. अद्याप चाचणीच सुरू आहे.
या चाचणीदरम्यानच गेल्या दोन-तीन दिवसांत योजनेवरील पाइपलाइनला दोनदा गळती लागल्याने देवपूर भागातील अनेक कॉलन्यांचा पाणीपुरवठा विस्कळित झाला. आठ-आठ, दहा-दहा दिवस झाले तरी नागरिकांना पाणी मिळालेले नाही.
त्यामुळे नागरिकांसह प्रभागातील नगरसेवक आंदोलनाच्या तयारीत आहेत. एकीकडे ही स्थिती असताना मंगळवारी (ता. ३) दुपारी दीडच्या सुमारास तापी योजनेवरील बाभळे पंपहाउसजवळ एअर व्हॉल्व्ह फाटला. त्यामुळे मोठ्या प्रमाणावर पाणी वाया गेले.
परिणामी शहराचा पाणीपुरवठा बंद करण्यात आला. दरम्यान, व्हॉल्व्ह दुरुस्तीचे काम तातडीने हाती घेतले असून, रात्री दहा-अकरापर्यंत दुरुस्तीचे काम पूर्ण करून पाणीपुरवठा सुरू करू, असा विश्‍वास महापालिकेचे सहाय्यक अभियंता एन. के. बागूल यांनी व्यक्त केला.
तरीही वेळापत्रक बिघडणार
व्हॉल्व्ह दुरुस्तीचे काम महापालिकेने तातडीने हाती घेऊन रात्री पाणीपुरवठा सुरू केला तरी दुपारनंतर रात्री सुमारे अकरापर्यंत योजनेवरील पाणीपुरवठा बंद राहिल्याने पाइपलाइन रिचार्ज होण्यासाठीही वेळ लागेल. परिणामी ज्या भागात मंगळवारी पाणीपुरवठा होणार होता, त्या भागाच्या पाणीपुरवठ्याचे वेळापत्रक पुन्हा विस्कळित झाले आहे. शिवाय त्यापुढील वेळापत्रकही तेवढेच लांबणार आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
