धुळे : जीर्ण वीजतारेचा शॉक लागून महिलेचा मृत्यू

लामकानी (जि. धुळे) : लग्नानिमित्त लामकानी येथे आजी आजोबांना भेटण्यासाठी आलेल्या एका महिलेचा वीज तारेचा शॉक (Electric Wire Shock) लागून मृत्यू झाल्याची घटना १६ मेस घडली आहे. (Woman dies due to shock of power line Dhule News)

स्वरा पंकज शेलार (वय २३ ) असे या महिलेचे नाव असून, घराच्या गच्चीवर उन्हात टाकलेले कपडे काढण्यासाठी स्वरा गेली असता हवेच्या झोक्यात घरासमोरील मुख्य प्रवाह वीज तार साडीला लागून स्वराला जबर वीजेचा धक्का बसला. तिला तत्काळ धुळे येथील जिल्हा रुग्णालयाला नेले असता डॉक्टरांनी तपासून मृत घोषित केले. येथील योगेश महाले यांची मुलगी होत. स्वराचा नंदुरबार जिल्ह्यातील एचाळे येथील पंकज शेलार यांच्याशी दोन वर्षापूर्वीच विवाह झाला होता. त्यांना दहा महिन्याची लहान मुलगी आहे.

जीर्ण तारांनीच स्वराचा घात केल्याचे ग्रामस्थांनी महावितरणच्या निष्काळजीपणा विषयी संताप व्यक्त केला आहे. महावितरणचे विद्युत निरीक्षक महाजन,अतिरिक्त कार्यकारी अभियंता आर.एम.पाटील,सहाय्यक अभियंता काकडे यांनी लामकानीला भेट दिली. भेटीप्रसंगी, स्वराच्या मृत्यूस महावितरणच जबाबदार असे म्हणत पंचायत समिती सदस्य तुषार महालेंनी महावितरण अधिकाऱ्यांना धारेवर धरले आहे. तीन मार्चला महावितरणला जीर्ण तारा तत्काळ बदलण्याच्या दिलेल्या मागणी पत्राचा उल्लेख त्यांनी यावेळी केला.