Dhule Accident News : आयशर उलटल्याने सोनगीरच्या डॉ. सोनवणेंचा अपघाती मृत्यू; सारेच हळहळले

Dhule Accident News : स्कूटीवर जाणाऱ्या महिला डॉक्टरवर भरधाव आयशर उलटल्याने जागीच मृत्यू झाल्याची घटना शुक्रवारी (ता.८) सकाळी दहाच्या सुमारास मुंबई आग्रा महामार्गावर सरवड (ता. धुळे) फाट्याजवळ घडली.

डॉ. आदिती जोगळेकर- सोनवणे (३५, रा. धुळे) असे मृत महिलेचे नाव असून त्या येथील ग्रामीण रुग्णालयात दंतचिकित्सक म्हणून कार्यरत होत्या. स्कुटीने रूग्णालयात कर्तव्यावर येत होत्या. (woman doctor died on spot after Eicher overturned dhule accident news)

डॉ. जोगळेकर- सोनवणे दुचाकीने (एमएच 18 / बीव्ही 0751) धुळ्याहून सोनगीरला येत होत्या. त्याचवेळी सरवड फाट्याजवळ मागून भाजीपाला भरलेला आयशर ट्रक (आरजे 12 / जीबी 8160) डॉ. जोगळेकर यांच्या दुचाकीवर उलटला. यात त्या गंभीररीत्या जखमी झाल्या. स्थानिकांनी त्यांना आयशर खालून बाहेर काढले व रुग्णवाहिकेचे धुळ्याला रवाना केले.

मात्र, तत्पूर्वीच त्यांचा मृत्यू झाला होता.

हेही वाचा : Credit Card फसवणूक....काय घ्याल काळजी?

अपघाताचे वृत्त समजताच सहाय्यक पोलिस निरीक्षक गणेश फड, हवालदार सूरजकुमार साळवे, विजयसिंग पाटील, संजय जाधव दाखल झाले. क्रेनच्या सहाय्याने अपघातग्रस्त आयशर बाजूला करून वाहतूक सुरळीत केली.

उत्कृष्ट सेवा देणाऱ्या हसतमुख दंतचिकित्सक डॉ. जोगळेकर यांचा अपघाती मृत्यू झाल्याचे समजताच गावात शोककळा पसरली. येथील ग्रामीण रुग्णालयातील वैद्यकीय अधिकारी, कर्मचारी एवढेच नव्हे तर रुग्णांनादेखील अश्रू अनावर झाले होते. धुळ्याचे दंतरोग तज्ज्ञ डॉ. मनोज सोनवणे हे डॉ. जोगळेकरांचे पती असून त्यांना लहान मुलगी आहे.