यावेळी उत्तर प्रदेश विधानसभेत मुस्लिम लोकप्रतिनिधींची संख्या वाढलीय.
लखनऊ : उत्तर प्रदेश विधानसभा निवडणुकीची (Uttar Pradesh Assembly Election) रंगीत तालिम संपलीय. जनता जनार्दननं आपला कौलही दिलाय. निवडणुकीत 255 जागा जिंकून भाजप पुन्हा सत्तेत आलंय. निवडणुकीचे निकाल (UP Election Result) लागल्यानंतर आता नवे तथ्य समोर येत आहेत. अशीच एक बाब मुस्लिम उमेदवारांबाबत समोर आलीय. 2017 च्या विधानसभा निवडणुकीत एकूण 25 मुस्लिम उमेदवार (Muslim Candidates) निवडणूक जिंकून सभागृहात पोहोचले होते. मात्र, या निवडणुकीत 34 मुस्लिम उमेदवार विजयी झाले आहेत. याचाच अर्थ यावेळी उत्तर प्रदेश विधानसभेत मुस्लिम लोकप्रतिनिधींची संख्या वाढलीय.
विशेष म्हणजे, यावेळी सर्व मुस्लिम उमेदवार समाजवादी पक्षातून (Samajwadi Party) किंवा सपाच्या मित्रपक्षातून निवडणून आले आहेत. बसपा (BSP), काँग्रेस आणि असदुद्दीन औवेसी (Asaduddin Owaisi) यांच्या एआयएमआयएमनं (AIMIM) या निवडणुकीत 223 हून अधिक मुस्लिम उमेदवार उभे केले होते. आश्चर्याची बाब म्हणजे, या सर्वांना पराभवाचा सामना करावा लागलाय. तर, 97 टक्के उमेदवारांचं डिपॉझिट जप्त झाल्याचं कळतंय.
बसपानं 88 मुस्लिम उमेदवारांना तिकीट दिलं होतं. यापैकी एकही उमेदवार विजयी होऊ शकला नाही. काँग्रेसनं (Congress) यावेळी 399 जागांवर आपले उमेदवार उभे केले होते, त्यापैकी 75 मुस्लिम उमेदवार होते. काँग्रेसच्या तिकिटावर निवडणूक रिंगणात उतरलेल्या सर्व मुस्लिम उमेदवारांना पराभवाला सामोरं जावं लागलंय. हैदराबादचे (Hyderabad) खासदार असदुद्दीन औवेसी यांच्या एआयएमआयएमनंही 60 हून अधिक जागांवर मुस्लिमांना तिकीट दिलं होतं. या निवडणुकीत एआयएमआयएमचे सर्व उमेदवार तोंडघशी पडलेत. मिळालेल्या माहितीनुसार, बसपा, काँग्रेस आणि एआयएमआयएमनं मुस्लिम समुदायाला खुश करण्याचा प्रयत्न केला खरा, पण यात त्यांना अपयश आलंय. तर दुसरीकडं अखिलेश (Akhilesh Yadav) यांच्या पक्षाच्या मुस्लिम उमेदवारांनी चांगली कामगिरी केलीय.
यावेळच्या उत्तर प्रदेश विधानसभा निवडणुकीत समाजवादी पक्षानं एकूण 64 मुस्लिम उमेदवार उभे केले होते. 'टाइम्स ऑफ इंडिया'च्या वृत्तानुसार, यापैकी 31 उमेदवार निवडणूक जिंकण्यात यशस्वी ठरले. सपाचे 50 टक्के मुस्लिम उमेदवार विजयी झालेत. याशिवाय, सपा आघाडीत समाविष्ट असलेल्या आरएलडीचे 2 आणि ओमप्रकाश राजभर (Omprakash Rajbhar) यांच्या सुहेलदेव भारतीय समाज पक्षाचा 1 मुस्लिम उमेदवार विजयी झालाय.
2017 च्या विधानसभा निवडणुकीपेक्षा यंदाच्या निवडणुकीत जास्त मुस्लिम उमेदवार विजयी झाले. गेल्या निवडणुकीत 403 जागांच्या उत्तर प्रदेश विधानसभेत 25 मुस्लिम आमदार होते. यावेळी हा आकडा 34 वर पोहोचलाय. सर्व मुस्लिम उमेदवार सपा किंवा सपा आघाडीशी संबंधित आहेत, हे विशेष! इतर पक्षांचा एकही मुस्लिम उमेदवार विजयी होऊ शकला नाहीय.
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
