UP Assembly Election: भाजपला ४७ जागा मिळतील; स्वामीप्रसाद यांचा दावा

लखनौ : भाजप सोडून समाजवादी पक्षाच्या तंबूत दाखल झालेले माजी मंत्री स्वामी प्रसाद मौर्य यांनी उत्तर प्रदेशात भाजपला २०१२ च्या निवडणुकीप्रमाणेच म्हणजेच ४७ जागा मिळतील, असा दावा केला आहे. अखिलेश यादव यांच्या समाजवादी पक्षाच्या आघाडीला उत्तर प्रदेशात दणदणीत यश मिळेल, असेही त्यांनी म्हटले आहे. (UP Assembly Election Updates)

स्वामी प्रसाद मौर्य हे राज्यातील ओबीसी नेते मानले जातात. विधानसभा निवडणुकीत भाजप २०१२ च्या आकड्यावर येईल, असे ते म्हणाले. मौर्य म्हणाले की, १० मार्चच्या निकालानंतर राज्यातील ओबीसी भाजपसवेत आहे की नाही, हे देशाला कळून चुकेल. उत्तर प्रदेशात समाजवादी पक्षाचे सरकार आल्यास उपमुख्यमंत्री होण्याची संधी मिळेल काय, असे विचारले असता ६८ वर्षीय मौर्य म्हणाले की, पद मिळवणे हे ध्येय नसून गरीब, मागासवर्गीय, दलित घटकांची सेवा करणे आणि त्यांना पुढे नेणे हाच आपला विचार राहिलेला आहे. कोण उपमुख्यमंत्री होणार आणि कोणाला मंत्रिपद मिळणार हा मुद्दा महत्त्वाचा नसून उत्तर प्रदेशला भाजपपासून कशी मुक्ती मिळेल आणि त्यांना सत्तेपासून दूर कसे ठेवता येईल, हाच खरा मुद्दा आहे.

कुशीनगर जिल्ह्यातील फाजिलपूर मतदारसंघातून स्वामीप्रसाद मौर्य निवडणूक लढवत आहेत. भाजपमध्ये प्रवेश करणारे आरपीएन सिंह यांच्यापासून धोका असल्यानेच मतदारसंघात बदल करावा लागल्याचे वृत्त त्यांनी फेटाळून लावले. स्वामीप्रसाद मौर्य यांनी अगोदर पौडरोना येथून निवडणूक लढवली होती. समाजवादी पक्षाच्या रणनितीनुसार मतदारसंघात बदल करण्यात आल्याचे मौर्य म्हणाले. ते म्हणाले, की आरपीएन सिंह कोणती निवडणूक लढवत आहेत, मला सांगा. अर्थात ते रिंगणात उतरलेले नाहीत आणि जरी उतरले तरी आमचा उमेदवार त्यांना पराभूत करेल, असा विश्‍वास आहे. भाजपकडून राष्ट्रवादाचे स्लोगन केले जात असले तरी प्रत्यक्षात ‘८०-२० चे स्लोगन पुढे आणले जात असून या माध्यमातून समाज आणि देशात फुटीचे बीज रोवण्याचे काम केले जात असल्याचा आरोप मौर्य यांनी केला आहे.