नागपूर ः ख्वाजा युनूसच्या खुनाचा आरोप असतानाही वाझे यास पुन्हा पोलिस सेवेत परत घेणे ही महाविकास आघाडी सरकारची सर्वात मोठी चूक होती. या चुकीमुळे सरकार अडचणीत आले आहे, असे समाजवादी पक्षाचे प्रदेशाध्यक्ष आमदार अबू आजमी यांनी म्हटले आहे.
एक खासगी कार्यक्रमासाठी आजमी नागपूरला आले होते. नागपूर विमानतळावर त्यांनी पत्रकारांसोबत संवाद साधला. ख्वाजा युनूस रहस्यमरित्या गायब झाला आहे. त्याचा खून झाल्याची चर्चा असून वाझे याची या प्रकरणात संशयास्पद भूमिका आहे. तब्बल सोळा वर्षे निलंबित ठेवल्यानंतर महाविकास आघाडी सरकारने त्याला परत सेवेत घेतले. याची माहिती मिळताच आपण राष्ट्रवादी काँग्रेसचे नेते शरद पवार आणि गृहमंत्री अनिल देशमुख यांची भेट घेऊन ही चूक निदर्शनास आणून दिली. मात्र परवीरसिंग यांच्या सल्ल्यानेच वाझे याला सेवेत घेण्यात आल्याचा दावाही आजमी यांनी केला.
भाजपने ज्या दिवशी वाझेचा विषय उकरून काढला त्याच दिवशी त्याला निलंबित करणे आवश्यक होते. वाझे हा वादग्रस्त अधिकारी आहे. त्याचे चरित्र पहिलेपासूनच वाईट आहे. मी महाविकास आघाडीसोबत आहे. असे असले तरी वाझेला पुन्हा सेवेत घेण्याला आपला सुरुवातीपासूनच विरोध होता. त्याला सेवेत घेण्याविषयी परमबीरसिंग आग्रही होते. त्यांच्या सल्ल्यानेच गृहविभागाने वाझेला सेवेत घेऊन वाद ओढवून घेतला. आता परमबीरसिंगही सरकारवर उलटले असल्याचे अबू आजमी यांनी सांगितले.
तत्पूर्वी नागपूर विमानतळावर अबू आजमी यांचे सपाचे प्रदेश अध्यक्ष अजय खानोरकर, जिल्हाध्यक्ष रविकांत खोब्रागडे, शहराध्यक्ष टी.ए. खान, महिलाध्यक्ष ममता तिवारी, उपाध्यक्ष नीलकंठ काचेवार, महासचिव परवेज सिद्दिकी, महासचिव इतहार खान, सचिव एजाज खान , मुस्ताक खान, माया चवरे आदींनी स्वागत केले.
संपादन - अथर्व महांकाळ
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.