मोठी बातमी :  नागपूर जिल्ह्यातील शेतकरी धास्तावले; अख्खा हंगामच धोक्यात, वाचा सविस्तर

मेंढला (ता. नरखेड, जि. नागपूर) : नरखेड तालुक्यातील शेतकऱ्यांना यावर्षी मोठ्या संकटाचा सामना करावा लागत आहे. एकीकडे कोरोनामुळे संपूर्ण जगात भीतीचे वातावरण असताना शेतकऱ्यांना कमी खर्चात जास्त उत्पादन देणाऱ्या सोयाबीन पिकावर खोडकिडा, येलो मोझाईक (मुळकुंज) रोगाचा प्रादुर्भाव झाल्याने सोयाबीन पीक शेतकऱ्यांच्या हातातून गेले.

शेतकरी दरवर्षी सोयाबीनच्या भरोशावर दिवाळी उत्साहाने साजरा करायचा, परंतु आता सोयाबीनवर खोडकिडा, मुळकुंज रोगांच्या प्रादुर्भावामुळे सोयाबीन पीक शेतकऱ्यांच्या हातचे गेले. सोयाबीन हातचे गेल्याने शेतकऱ्यांनी हिंमत न हारता कपाशी पिकावर लक्ष्य केंद्रित केले होते. एक पीक गेले तरी कपाशीपासून यावर्षी चांगले उत्पादन घेऊ, अशी हिंमत शेतकऱ्यांना होती. परंतु, गेल्या काही दिवसांपासून सुरू असलेल्या संततधार पावसामुळे कपाशीचे पीकही धोक्यात आले आहे.

अधिक वाचा - हे उपाय करा आणि कायमचे घालवा चेहऱ्यावरील वांग.. जाणून घ्या महत्वाची माहिती
 

नरखेड तालुक्यातील महेंदी येथील शेतकरी नीलेश ढोरे यांनी यावर्षी त्याच्या तीस एकर शेतात कपाशी पिकाची लागवड केली. पीक चांगल्या स्थितीत होते. परंतु, सततच्या पावसामुळे शेतातील कपाशीवर मररोगाचा प्रादुर्भाव झाला व शेतातील संपूर्ण कपाशीचे पीक नष्ट होत आहे. संपूर्ण शेतात पाणीच पाणी साचल्याने कपाशीची झाडे मरत आहेत. नरखेड तालुक्यातील बहुतांश शेतकऱ्यांची हीच स्थिती आहे. सुरुवातीला सोयाबीन पिकावर खोडकिडा गेला आणि आता कपाशी पिकावर मररोगाचा प्रादूर्भाव झाला. आता सांगा शेतकऱ्यांनी कसे जगावे, आपल्या कुटुंबीयांचा कसा सांभाळ करावा, या विचाराने शेतकरी संकटात सापडले आहेत. शासनाने कपाशी पिकावर आलेला मर रोगाचा सर्व्हे करून शेतकऱ्यांना नुकसानभरपाई द्यावी, अशी मागणी परिसरातील शेतकरी करीत आहे.

अधिक माहितीसाठी - काय सांगता! या गावात पडला चक्क मासोळ्यांचा पाऊस...लोकांच्या घरावर, अंगणात मासोळ्याच मासोळ्या
 

मर रोग म्हणजे काय 

शेतात जास्त प्रमाणात पाणी साचल्याने शेतातील पिकांची मुळे अति पाण्यामुळे खराब होतात. शेतात पाणी साचल्याने हा रोग वाढतो. तसेच काही जमीन जास्त पाणी साचवून ठेवू शकत नाही. त्यामुळे ती जमीन पाजरल्यासारखी होते. त्यामुळे कपाशीवर मर रोग येतो. 

शेतकऱ्यांना नुकसानभरपाई द्यावी
माझ्या शेतात यंदा तीस एकर शेतामध्ये कपाशी पिकाची लागवड केली. पीकसुध्दा चांगल्या स्थितीत होते. परंतु दोन दिवसांच्या सततच्या पावसाने संपूर्ण कपाशीवर मर रोगाचा प्रादुर्भाव झाला व कपाशी जमीनदोस्त होत आहे. तरी शासनाने कपाशी पिकाचा सर्वे करून शेतकऱ्यांना नुकसानभरपाई द्यावी. 
नीलेश ढोरे 
शेतकरी नांदणी  

सततच्या पावसामुळे नुकसान
माझ्याकडे अडीच एकर शेती आहे. मी त्या संपूर्ण शेतात कपाशी पिकाची लागवड केली आहे. पहिले कपाशी पीक चांगल्या परिस्थितीमध्ये होते. परंतु दोन दिवसांच्या लगातार पावसाने संपूर्ण कपाशीवर मर रोग गेला असून संपूर्ण शेतातील कपाशी पीक नष्ट होत आहे. शासनाने लवकरात लवकर सर्वे करून नुकसान भरपाई द्यावी. 
गजानन बनकर, शेतकरी मेंढला 

शेतातून पाणी बाहेर काढा
दोन अॉगस्टपासून सुरू असलेल्या पावसामुळे संपूर्ण कपाशीच्या शेतात पाणी साचल्याने व त्या पाण्याचा निचरा होत नसल्याने कपाशी पिकावर मर रोगाचा प्रादुर्भाव झाला आहे. कपाशी पिकाच्या मुळाजवळ जास्त पाण्यामुळे बुरशीजन्य रोगाचा प्रादुर्भाव झाला. त्यामुळे कपाशीवर मर रोग आला आहे. शेतकऱ्यांनी ज्या शेतात पाणी साचलेले आहे त्या पाण्याला शेतामधून बाहेर काढावे. 
डॉ. योगीराज जुमडे, कृषी अधिकारी नरखेड

संपादित ः अतुल मांगे