आठवत का आपली पहिली भेट कुठे झाली होती ?

नागपूर : लॉकडाऊनचा काळ वाढवला गेला आहे , त्यामुळे सोशल मीडियावर बराच वेळ ऑनलाईन राहणारे नेटिजन्स या काळात विविध शक्कल लढवत कधी टाईमपास तर कधी प्रबोधन तर कधी समीक्षा करण्यात व उपदेश करण्यातही गुंतले आहेत . ' आठवतं का आपली पहिली भेट कधी झाली होती . . ? ' शिर्षकाचा एक ट्रेंड सध्या फेसबुकवर जोरात चालू आहे .

अवश्य वाचा - कोरोनामुळे या व्यवसायावरही संकट; करावे तरी काय?

यामध्ये लाईक पेक्षा कमेंट प्रति कमेंटचा वर्षाव पाहायला मिळतो आहे . लॉकडाऊनच्या काळात  प्रत्येकजण या वेळेचा विविध अंगाने वापर करीत आहेत . काहीजण वाचन , संगीत ऐकणे , जुने लेखन किंवा आपली कामे पूर्ण करणे ,  मनोरंजक कार्यक्रम पाहणे , बुद्धिबळ कॅरम  असे खेळ खेळणे असे प्रयोग करताहेत . या साऱ्यात सर्वाधिक प्राधान्य युवा व त्यापुढील मध्यम वयीन पिढी देत आहे ते सोशल मीडियाला.व्हॉटस् अॅप, फेसबुक, टिकटॉक, इन्स्टाग्राम, यू ट्युब अशात घरोघरी अनेकजण गुंतले आहेत . मग त्यातही नेटिजन्स विविध ट्रेंड चालवत आहेत.

आपले नाव सुरुवातीलाच टाकून आपण मला ओळखत असालच असे म्हणून आपण पहिल्यांदा केव्हा कोठे भेटलो , त्यावेळी आपल्यात काय संवाद झाला , निमित्त कोणते होते , काही देवाण - घेवाण झाली काय , त्यावेळचा एखादा फोटो असेल तर शेअर करावा ,     माझ्याविषयी आपल्याला काय वाटते . . ? आपली प्रत्यक्ष भेट झाली नसेल तर अन्य कॉल मेसेजद्वारे किंवा अन्य कोणत्या माध्यमातून आपला परिचय झाला . . ? याची माहिती सांगण्याबाबत आवाहन आपल्या मित्रांना करणारी ही एकच पोस्ट अनेकजण आपल्या वॉलवर पोस्ट करीत आहेत . विशेष म्हणजे या प्रयोगाला प्रतिसाद देखील चांगला मिळतो आहे. कदाचित आपणास हे आवडणार नाही ; पण सर्वच जण विचारताहेत म्हणून मीही विचारत आहे , असा खुलासा देखील या आवाहनात आहे . एकूणच या उपलब्ध कालावधीत लाईक पेक्षा कमेंट अधिक असणारा हा ट्रेंड आहे.

कोरोनाच्या बातम्या व पोस्ट सातत्याने वाचून पाहून येणारी काहीशी नकारात्मक किंवा निराश भावना दूर करण्यासाठी हे इंटरेस्टिंग ट्रेंड चालवले जात आहेत . आपले जुने फोटो व त्याला रोचक कमेंटबरोबरच फेसबुकवर आठवतं का आपली पहिली भेट कधी झाली . . ? असा सवालात्मक ट्रेंड सध्या खूप जोरात आहे . यामध्ये आपल्या फेसबुक मित्रांना आपल्या पहिल्या भेटीबद्दल विचारणा करत कोरोनाच्या संकटाकडे दुर्लक्ष करून जगण्याचा आनंद लुटला जात आहे .