पावसानं नागपूरकरांच्या दिवसाची सुरुवात, मेघगर्जनेसह बरसल्या सरी

नागपूर : प्रादेशिक हवामान विभागाचा अंदाज पुन्हा एकदा तंतोतंत खरा ठरला. 18, 19 आणि 20 मार्चला विदर्भात मुसळधार पावासाचा अंदाज हवामान विभागाने वर्तविला होता. त्यानुसार आज सकाळीच नागपुरात मेघगर्जनेनुसार पावसाच्या सरी बरसल्या. त्यामुळे भाजीपाला आणि मॉर्निंग वॉकसाठी बाहेर पडलेल्या नागरिकांची चांगलीच तारांबळ उडाली. 

हेही वाचा - ३० वर्षांपूर्वीही ममतांवर झाला होता जीवघेणा हल्ला, जखमा अन् हल्ल्यांनी ममतांच्या राजकीय कारकिर्दीला दिला आकार

नागपुरात आज सकाळपासून आकाशात ढग जमले होते. तसेच अंधार देखील पडला होता. त्यातच लॉकडाउन असल्याने नागरिकांना बाहेर फिरण्यास बंदी घालण्यात आली आहे. मात्र, दररोजच्या सवयींप्रमाणे नागरिक बिनधास्त मॉर्निंग वॉकसाठी बाहेर पडले. तसेच दुपारी १ वाजेपर्यंत दुकाने सुरू राहणार असल्याने अत्यावश्यक वस्तूंची खरेदी करण्यासाठीही गर्दी जमली होती. त्यातच पावसाने मेघगर्जनेसह हजेरी लावल्याने अनेकांची तारांबळ उडाली. अनेकांना आडोशाचा आधार घ्यावा लागला. छत्र्या व रेनकोट नसल्याने अनेकांना ओल्या अंगाने घर गाठावे लागले. 

गेल्या आठ दिवसांपासून वातावरणात उकाडा निर्माण झाला होता. त्यात आता पावसाच्या सरी बरसल्याने नागरिकांना उकाड्यापासून दिलासा मिळाला आहे. येत्या दोन दिवसांत आणखी पावसाचा अंदाज वर्तविण्यात आला असून ही त्याची सुरुवातच म्हणावी लागेल.