खरीपाची तयारी रखडली, कापूस खरेदीस विलंब, शेतकरी हतबल अन्‌ त्यांनी पुढे केले काय...

पारशिवनी (जि.नागपूर) :  कापूस खरेदीला होत असलेला विलंब, खरेदीसाठी नोंदणीमुळे दलालांमार्फेत होणारा गैरव्यवहार, दलालांची मक्‍तेगिरी या बाबींना कंटाळून शेतकऱ्यांची सहनशक्ती संपल्याने अखेर आज दुपारी तालुक्‍यातील शेतकरी कापूस खरेदी केव्हा करणार, या प्रश्‍नाचा शासनाला जाब विचारण्यासाठी तहसील कार्यालयावर धडकले व आवारात ठिया आंदोलन केले. शासनाचे लक्ष वेधण्याकरिता आंदोलनकर्त्या शेतकऱ्यांनी सोशल डिस्टन्सिंगचे पालन करीत एकत्र आले.

शेतकऱ्यांचा कापूस खरेदी करा, खासगी जिनिंग सुरू करून शासनाने शेतकऱ्यांचा कापूस ताबडतोब खरेदी करावा, हमीभावानुसार शेतकऱ्यांच्या कापसाला भाव द्या, तालुक्‍यातील खासगीसह सरकारी कापूस जिनिंग सुरू करून दररोज 50 शेतकऱ्यांचा कापूस खरेदी करावा व इतर मागण्यांसाठी कॉंग्रेस नेते उदयसिंग यादव यांच्या नेतृत्वात तहसील कार्यालयाच्या आवारात शेतकऱ्यांनी ठिया आंदोलन करून त्यांनी मागण्या शासन दरबारी मांडल्या.

हेही वाचा : खूश खबर गरीबांची डाळ आता शिजणार, डाळीच्या भावात घट

शेतकऱ्यांचा कापूस घरी पडलेला
लवकरच खरीप हंगाम सुरू होणार असून या वर्षीचा कापूस अजूनपर्यंत शासनाने खरेदी केला नाही. हाती पैसा नसल्याने खरीप हंगामाची तयारी करायची कशी? शेतकऱ्यांचा कापूस आजही शेतकऱ्यांच्या घरी पडून असल्याने शेतकरी चिंतित आहे. त्यामुळे शासनाने खासगी जिनिग कंपनी ताब्यात घेऊन शासनामार्फत या खरेदी केंद्रावर कापूस खरेदी करण्याची मागणी यावेळी शेतकऱ्यांनी निवेदनामार्फत केली. त्यावेळी माजी जि. प. सदस्य कोमलचंद राऊत, मधुकर बेले, प्रमोद काकडे, हर्षवर्धन निकोसे, कलाताई ठाकरे, नीलेश भोयर, सविता चिंचुळकर, प्रभाकर भोयर, मंगेश जोगळे, बंटी उपरे, मंगेश जोग, माधवराव सारवे, सपकाळ गुरुजी, शुभम राऊत, वैभव खोब्रागडे, सचिन आमले व अन्य शेतकरी उपस्थित होते.

हेही वाचा :  या दलालांना आवरा रे कुणीतरी, घरकुलाच्या अनुदानासाठी चक्‍क गरीबांना मागतात पैसे...

अन्याय सहन केला जाणार नाही
खासगी जिनिंग शासनाने आपल्या ताब्यात घेऊन येथे सरकारी योजनेमार्फत शेतकऱ्यांचाच कापूस खरेदी करावा. पालकमंत्री यांनी विनंती करून तत्काळ कापूस खरेदी करण्याची मागणी करण्यात आली. दलालांचा कापूस खरेदी करू नये. पावसाळा महिन्याभरावर असून खरीप हंगाम सुरू होणार आहे. तालुक्‍यातील प्रत्येक शेतकऱ्यांचा कापूस खरेदी करणयात यावा, अन्यथा शेतकऱ्यांवर होणारा अन्याय सहन केला जाणार नाही व तीव्र आंदोलन करण्यात येणार आहे.
उदयसिंग यादव
कॉंग्रेस नेते

पावसाळ्यात कापूस खरेदी करणार काय?
हाती पैसा नाही. कापूस अजून घरीच आहे. खरीप हंगाम आला असून आता वेळ नाही. अवैध खासगी जिनिंग बंद आहे. सरकारी कापूस खरेदी सुरू आहे. पण, 15 शेतकऱ्यांचा कापूस खरेदी केला जातो. 1800 शेतकऱ्यांची नोंदणी झाली आहे. आमचा नंबर काय पावसाळ्यात लागणार काय? पावसाळ्यात कापूस खरेदी करणार काय? आम्ही पेरणीसाठी पैसा कुठून आणायचा? सगळे बेताल कामकाज झाले आहे. शेतकऱ्यांचं मरण समोर दिसत आहे.
सचिन आमले
शेतकरी