नागपूर विद्यापीठाच्या खेळाडूंना मिळणार आणखी एक सिंथेटिक ट्रॅक; तब्बल साडे दहा कोटींचा निधी मंजूर

नागपूर : गेल्या काही वर्षांपासून रखडलेल्या राष्ट्रसंत तुकडोजी महाराज नागपूर विद्यापीठाच्या सिंथेटिक ट्रॅकला अखेर मुहूर्त मिळाला आहे. टेंडर प्रक्रिया अंतिम टप्प्यात असून, लवकरच ट्रॅकच्या कामाला सुरूवात होणार असल्याची विश्वसनीय माहिती आहे.
नागपूर विद्‌यापीठाच्या धावपटूंना सराव करता यावा तसेच शहरात राज्य व राष्ट्रीय ॲथलेटिक्‍स स्पर्धांचे नियमित आयोजन व्हावे, या उद्‌देशाने विद्‌यापीठाच्या सध्याच्या शिंडर ट्रॅकवर आंतरराष्ट्रीय दर्जाचा सिंथेटिक ट्रॅक बांधण्याचा महत्वाकांक्षी निर्णय सात वर्षांपूर्वी घेण्यात आला होता. 

दोनवेळा टेंडरची प्रक्रिया पूर्ण झाली होती. कंत्राट सार्वजनिक बांधकाम विभागाकडे सोपविण्यात आले. विद्यापीठाने १०.६० कोटींचा निधीही विभागाला सुपूर्द केला. कामाला सुरुवात होणार तोच लोकसभा निवडणूक आली आणि काम थंडबस्त्यात पडले. त्यानंतर कोरोनामुळे त्यात पुन्हा व्यत्यय आला. दोनवेळा टेंडर प्रक्रिया पुढे ढकलण्यात आल्यानंतर पुन्हा प्रक्रियेला गती आली आहे.

 हेही वाचा - नव्या वर्षात नवे महापौर, संदीप जोशी यांना द्यावा लागणार राजीनामा

सार्वजनिक बांधकाम विभागाच्या कार्यकारी अभियंता अल्पना पाटणे यांनी दिलेल्या माहितीनुसार, ट्रॅकचे इस्टीमेट तयार करण्यात आले असून, मंजुरीसाठी सीएकडे गेले आहे. त्यांच्याकडून हिरवी झेंडी मिळाल्यानंतर नव्याने टेंडर व वर्कऑर्डर निघणार आहे. त्यामुळे एक ते दीड महिन्यात प्रत्यक्ष बांधकामाला सुरूवात होण्याची दाट शक्यता आहे. बांधकाम दीड वर्षात पूर्ण करण्यात येणार आहे. कुलगुरूंनीही ट्रॅक तातडीने पूर्ण करण्याचे निर्देश दिल्याची माहिती, क्रीडा व शारीरिक शिक्षण विभागाचे संचालक डॉ. शरद सूर्यवंशी यांनी दिली. उल्लेखनीय म्हणजे विद्यापीठ स्वतःच्या पैशाने हा ट्रॅक बांधत आहे.

सिंथेटिक ट्रॅक आठ लेनचा राहणार आहे. याशिवाय ट्रॅकच्या बाजूला लॉंग जम्पसाठी पीट राहील. तसेच मैदानाच्या चारही बाजूंनी फ्लडलाईट्‌स असतील. खेळाडू व तांत्रिक अधिकाऱ्यांव्यतिरिक्त कुणीही आत येऊ नये, यासाठी ट्रॅकच्या सभोवताल तारेचे कुंपणही आणि चिखल होऊ नये यासाठी आतील फुटबॉल मैदानावर कृत्रिम गवत लावण्यात येणार आहे. 

नक्की वाचा - बापरे! चक्क सरन्यायाधीश शरद बोबडे यांच्या आईची फसवणूक, आरोपीला अटक

बेस, ड्रेनेज सिस्टीम आणि लेव्हलिंग झाले असल्यामुळे सिंथेटिक ट्रॅक निर्धारित वेळेत पूर्ण व्हायला मदत होणार असल्याचे डॉ. सुर्यवंशी यांनी सांगितले. हा ट्रॅक मध्य नागपुरातील धावपटूंसाठी सोयीचा राहणार असून, विद्‌यापीठासह शहरातील इतरही युवा धावपटूंनाही याचा फायदा मिळणार आहे. शिवाय भविष्यात मोठमोठ्या राज्य व राष्ट्रीय स्पर्धांचे आयोजनसुद्‌धा होऊ शकेल. ट्रॅकअभावी विद्‌यापीठाला आतापर्यंत एकदाही आंतरविद्‌यापीठ स्पर्धांचे यजमानपद मिळू शकले नाही, हे उल्लेखनीय. मानकापूर येथील सिंथेटिक ट्रॅकनंतर नागपुरातील हा दुसरा सिंथेटिक ट्रॅक असणार आहे.

संपादन - अथर्व महांकाळ