आता यांना कोण सांगणार? कोरोना काळातही लग्नाला हजारो पाहुणे

सावनेर (जि. नागपूर) : खानगाव रोडवरील आशीर्वाद सभागृहात राज्य सरकार आणि जिल्हा दंडाधिकारी यांच्या आदेशाचा भंग करून हजारोंच्या उपस्थितीत विवाह सोहळा पार पडला. या प्रकरणाने सावनेर तहसील प्रशासन, नगर परिषद प्रशासन आणि पोलिस विभाग यांच्या कार्यप्रणालीवर प्रश्नचिन्ह निर्माण झाले आहे. 

हेही वाचा - भूक लागली आहे, जेवण कुठं मिळेल जी? खासगी रुग्णालयातील रुग्णांच्या नातेवाइकांची पायपीट

दुसऱ्या टप्प्यात वाढत्या कोरोना संक्रमणास सामोरे जाण्यासाठी मंत्री, जिल्हा दंडाधिकारी या गोष्टीकडे विशेष लक्ष देत गर्दी कमी करण्याचा प्रयत्न करीत आहेत. यासाठी सभागृहातील सर्व विवाह आणि इतर कार्यक्रमांना पूर्णत: बंदी घालूनही स्थानिक रहिवाशांनी मुलीचे लग्न थाटात केल्याची बाब उघडकीस आली आहे. 

हेही वाचा - कोरोना लसीबाबत शंका आहे? तर ही बातमी तुमच्यासाठी; जाणून घ्या प्रत्येक प्रश्नांचे उत्तर

अधिकाऱ्यांशी ओळख असल्याचा कसा फायदा घेतला जातो, हे सावनेरमध्ये शासनाच्या आदेशाला डावलून झालेल्या लग्नसोहळयावरून लक्षात येते. संबंधित व्यक्ती जिल्हाधिकारी कार्यालयात संबंधित असल्याचे बोलले जाते. याच ओळखीचा फायदा घेत मुलीचे लग्न हजारोंच्या उपस्थितीत पार पाडले. मात्र, सावनेर नगर पालिका, पोलिस प्रशासनाला याची माहिती असूनही कारवाई करण्यास उशीर लावल्याने कर्मचारी वर्गात उलटसुलट चर्चेला उधाण आले आहे. दुपारी तीन वाजता मिळालेल्या माहितीनंतर पालिका प्रशासनाने आशीर्वाद हॉलच्या मालकावर १७ हजार ५०० रूपयाचा दंड ठोठावला व त्यांना सात दिवस सभागृह बंद ठेवावे, यासाठी त्यांना कारणे दाखवा नोटीस देण्यात आली.