'तेरी बहन बहोत माल दिखती हैं', हे ऐकताच तो संतापला आणि... 

नागपूर : शहरातील हत्याकांडाचे सत्र थांबता थांबत नसून आजही दोन कुख्यात गुन्हेगारांनी मित्राच्या छातीची चाकूने चाळणी करीत खात्मा केला. ही थरारक घटना आज रविवारी दुपारी एक वाजताच्या सुमारास बारासिग्नल परिसरात घडली. गिरीश वासनिक (वय 28) असे खून झालेल्या गुन्हेगाराचे नाव आहे. अभिषेक बोरकर (वय 30, जाततरोडी) आणि नीलेश अंबुडरे (वय 30) अशी आरोपींची नावे आहेत. 

पोलिसांनी दिलेल्या माहितीनुसार, अभिषेक बोरकर आणि नीलेश अंबुडरे दोघेही कुख्यात आरोपी आहेत. दोघेही पोलिसांच्या रेकॉर्डवरील आहेत. रविवारी दुपारी बारा वाजताच्या सुमारास गिरीश वासनिक आणि अभिषेक बोरकर दोघे घराच्या वरच्या माळ्यावर दारू पित बसले होते. नुकताच जेलमधून सुटून आलेला नीलेश अंबुडरे याला अभिषेकने दारू पिण्यास बोलावले. तिघेही दारू पित बसले. 

सविस्तर वाचा - नवविवाहितेचा सासूसोबत झाला वाद; 'तुमचे काम करून देतो' असे म्हणतं प्रीती दासने केली ही मागणी...
 

दरम्यान, अभिषेकच्या बहिणीचा विषय निघाला. "तेरी बहन बहोत माल दिखती हैं' असे शब्द गिरीश वासनिकने वापरले. त्यामुळे अभिषेकचा पारा चढला. त्याने लगेच गिरीशच्या कानाखाली वाजवली. त्यानंतर दोघांनी एकमेकांशी वाद घातला. दोघांनी हाणामारी सुरू केली. दरम्यान, नीलेश अंबुडरे याने सुरुवातीला भांडण सोडविण्याचा प्रयत्न केला. मात्र, गिरीशने त्यालाही शिवीगाळ केली. त्यामुळे अभिषेक आणि नीलेश यांनी धारदार चाकूने गिरीशच्या छातीवर सपासप वार केले. 

गिरीशच्या छातीची पार चाळण केली. त्यानंतर त्याच्या डोक्‍यात फरशी घातली. गिरीश मृत पावल्याची खात्री पटताच दोघांनीही वेगवेगळ्या दिशेने पळ काढला. माहिती मिळताच इमामवाड्याचे ठाणेदार मुकुंद साळुंखेपथकासह घटनास्थळावर पोहचले. त्यांनी मृतदेह ताब्यात घेऊन मेडिकलला रवाना केला. याप्रकरणी अभिषेक आणि नीलेश अंबुडरेवर खुनाचा गुन्हा दाखल केला. अभिषेकला पोलिसांनी अटक केली असून नीलेशचा शोध सुरू आहे. 
 

जेलमधून सुटताच मर्डर 

नीलेश आणि अभिषेक बोरकरची मैत्री कारागृहात झाली होती. कोरोनाचे संकट लक्षात घेता गेल्या 26 जून रोजी म्हणजेच दोन दिवसांपूर्वीच नीलेश अंबुडरे याला मध्यवर्ती कारागृहातून सोडण्यात आले होते. कारागृहातून बाहेर येताच नीलेशने अभिषेकला हाताशी धरून गिरीशचा खून केला. 
 

मामा मी खून केला 

अभिषेक बोरकरने गिरीशचा खून केल्यानंतर आपल्या फार्मसीत काम करणाऱ्या मामाला फोन केला. "मामा गिरीशने माझ्या बहिणीच्या चारित्र्याबाबत अपशब्द वापरले. त्यामुळे त्याचा आत्ताच गेम केला' अशी माहिती दिली. मामाने त्याला लगेच चौकात बोलावले. त्याला दुचाकीवर बसविले आणि थेट इमामवाडा पोलिस गाठले. ठाणेदार साळुंखेयांच्यासमोर उभे केल्यानंतर अभिषेकने हत्याकांडाचा कबुली दिली.