वय ७७ अन् कामगिरी सुवर्ण; स्पेनमधील बॅडमिंटनसाठी आजोबा पात्र

लाखनी (जि. भंडारा) : भंडारा जिल्ह्यातील लाखनी तालुक्यामधील पोहरा गावचे ७७ वर्षीय आजोबा गोवा येथे झालेल्या राष्ट्रीय मास्टर्स बॅडमिंटन स्पर्धेत विजयी झाले. या कामगिरीमुळे त्यांची स्पेनमध्ये होणाऱ्या जागतिक स्पर्धेसाठी निवड झाली आहे.

सुदाम शहारे यांनी गोवा बॅडमिंटन असोसिएशनमार्फत आयोजित स्पर्धेत ७५ वर्षावरील वयोगटात एकेरीत विजेतेपदाला गवसणी घातली. अंतिम सामन्यात त्यांनी यजमान गोव्याचे सतीश कुडचडकर यांचा २१-१३, २५-२३ असा पराभव केला. उपांत्य फेरीत त्यांनी चौथे मानांकित गुजरातचे अल्फ्रेड ख्रिस्तीयनला यांना नमविले. यामुळे त्यांची नोव्हेंबर महिन्यात स्पेन येथे होणाऱ्या जागतिक स्पर्धेसाठी भारतीय संघात निवड करण्यात आली आहे. शहारे रोज दोन तास बॅडमिंटनचा सराव करतात व एक तास पोहण्याचा आनंद घेतात. या वयातही त्यांच्यात असलेला उत्साह तरुण पिढीला प्रेरणादायी ठरणारा आहे.

प्रोत्साहन देण्यासाठी गावकरी गोव्यात

आपल्या गावातील आजोबा स्पर्धेत सहभागी होणार असल्याची माहिती पोहरा येथील गावकऱ्यांना मिळताच गावकऱ्यांनी सरपंच रामलाल पाठनकर व मंगेश मेश्राम यांच्या पुढाकारातून थेट गोव्याची तयारी केली. सुदाम शहारे स्पर्धा खेळत असताना त्यांना गावकऱ्यांनी प्रोत्साहन दिले व विजयानंतर गोव्यात जल्लोष साजरा केला.