अबब! बेंबळा धरणात 20 किलोची एकच मासोळी...मासेमारी जोमात

चांदूर रेल्वे (जि. अमरावती) : मासेमारी ही अन्नपुरवठ्याच्या दृष्टीने जीवनावश्‍यक बाब आहे. वेगवेगळ्या प्रकारच्या मासोळ्यांसाठी खवय्यांची विशेष मागणी असते. अशातच चांदूर रेल्वे तालुक्‍यातील येरड (बाजार) येथे बेंबळा नदीच्या धरणातून तब्बल 20-20 किलोंच्या जवळपास मासोळ्या मच्छीमारांच्या जाळ्यात येत आहेत. त्यामुळे पावसाळ्यातही मासेमारीचा व्यवसाय चांगल्याप्रकारे सुरू असल्याचे दिसत आहे.

कोरोना विषाणूच्या प्रादुर्भावामुळे गेल्या तीन महिन्यांच्या कडक लॉकडाउनमध्ये अनेक व्यवसाय मंदावले होते. त्यात मच्छिमारीच्या व्यवसायाचासुद्धा समावेश होता. लॉकडाउनमध्ये मासोळीची मागणी कमी होती. आता लॉकडाउन शिथिल होत असताना व हॉटेलसुद्धा सुरू झाल्यामुळे मासोळ्यांची मागणीही वाढत आहे.

पावसाळा सुरू झाला असताना चांदूर रेल्वे तालुक्‍यातील येरड येथील बेंबळा नदीवरील धरणाला चांगले पाणी आले आहे. अशातच या नदीतील मासोळी पकडण्यासाठी कंत्राट देण्यात येतो. बेंबळा नदीचे कंत्राट एका कंत्राटदाराला मिळाल्याने या कंत्राटदाराकडून येरड येथील मच्छीमार मासोळ्या पकडतात. यामध्ये मच्छीमारांना प्रतिकिलोप्रमाणे मासे पकडण्याचे पैसे मिळतात.

इतर जिल्ह्यात होते निर्यात

गेल्या काही दिवसांपासून या नदीतून मोठेमोठ्या मासोळी मच्छीमारांच्या जाळ्यात लागत आहेत. तब्बल 20 किलोंची एकच मासोळी मिळत असल्याने खरेदीसाठी ग्राहकांचीही गर्दी वाढली आहे. या ठिकाणाहून नांदगाव खंडेश्वर तालुक्‍यात तसेच यवतमाळ जिल्ह्यात मासे पुरवठा होतो.

जाणून घ्या : अमरावतीत एका आमदारासह 25 जण कोरोनाबाधित...आरोग्य यंत्रणा सतर्क

आर्थिक व्यवहार व्यवस्थित
मी मच्छीमार असून माझ्या घरचा प्रपंच याच भरवशावर चालतो. येरड येथील धरण मासेमारीकरिता ठेकेदारीमध्ये गेल्याने आम्ही त्यांच्या अंतर्गत काम करतो. आम्हाला प्रतिकिलोप्रमाणे पकडण्याचे भाव मिळत असले; तरी घरचे आर्थिक व्यवहार व्यवस्थित चालतात.
- सुधाकर मानकर, मच्छीमार, येरड.

(संपादन : दुलिराम रहांगडाले)