चंद्रपुरात बाटली उभी; वर्धा जिल्ह्यावर दारूतस्करांची मदार

यवतमाळ : चंद्रपूर जिल्ह्यात दारूबंदी (liquor ban) होताच राजकीय पदाधिकाऱ्यांशी अर्थपूर्ण हातमिळवणी करून तस्कर सक्रिय झाले होते. मात्र, चंद्रपूर जिल्ह्यात आता आडवी बाटली उभी झाल्याने तस्करांचा हिरमोड झाला आहे. आता केवळ वर्धा जिल्ह्यावरच (liquor sale in wardha district) मदार अवलंबून राहणार आहे. (Alcohol was smuggled from a luxury vehicle)

अनेक वर्षे आंदोलन करण्यात आल्यावर चंद्रपूर जिल्ह्यात दारूबंदीचा निर्णय घेण्यात आला होता. महिला वर्गासह सामाजिक संघटनांनी या निर्णयाचे जोरदार स्वागत केले होते. बंदीमुळे दारूच्या व्यसनात बुडालेले वठणीवर येतील आणि संसाराची होणारी राखरांगोळी थांबेल, अशी अपेक्षा होती. मात्र, बिअरबार, दारूच्या दुकानांना टाळे लागताच अवैध दारूविक्रीला ऊत आला. कमी वेळात अधिक पैसे मिळविण्यासाठी अवैध व्यावसायिक सक्रिय झालेत.

राजकीय पदाधिकाऱ्यांना हाताशी धरून तस्करी सुरू केली. यासाठी चक्क महिला, मजूर वर्ग, विद्यार्थ्यांचा वापर केला. चंद्रपुरात यवतमाळ-वणीमार्गे बनावट दारू मोठ्या प्रमाणात जाऊ लागली. दुप्पट दराने दारूविक्री होत असल्याने मद्यपींनी बंदीबद्दल संतापही व्यक्त केला. उलट आधीपेक्षा बंदीत मोठ्या प्रमाणात दारूचे अड्डे सुरू झालेत. त्यामुळे चंद्रपुरातील दारूबंदी वादाच्या भोवऱ्यात सापडली होती.

राज्य सरकारने चंद्रपुरात दारूची बाटली उभी करताच तस्करांच्या मनसुब्यावर पाणी फेरले गेले आहे. वर्धा जिल्ह्यात अनेक वर्षांपासून दारूबंदी आहे. मधील काळात वर्धेत जाणारी दारू मोठ्या प्रमाणात चंद्रपूर येथे जात होती. कळंब, राळेगाव, देवगाव, पुलगाव यासह चोरट्या मार्गाने वर्धेत आलिशान वाहनांतून दारू नेली जाते. त्यासाठी नवनवीन शक्कल लढविली जात असल्याचे अनेकदा छापेमारीतून पुढे आले आहे.

खेप पोहोचविण्यासाठी स्पर्धा

दारूतस्करांना आता एकमेव दारूबंदी असलेल्या वर्धा जिल्ह्याचा पर्याय उरला आहे.आधी चंद्रपूर व वर्धा असे चित्र होते. त्यात बदल झाल्याने दारूची खेप पोहोचविण्यासाठी तस्करांची स्पर्धा वाढणार आहे. या स्पर्धेतून रक्तपात घडण्याची शक्‍यता नाकारता येत नाही. म्हणून संबंधित विभागाने विशेष खबरदारी घेत कारवाई करण्याची गरज आहे.

(Alcohol was smuggled from a luxury vehicle)