चोराला पकडायला पोलिस येताच 'त्याने' मारली माडीवरून उडी

तिवसा (जि. अमरावती) : नागपूर जिल्ह्यातील (Nagpur District) अनेक चोरीत समावेश असलेला अट्टल चोर गेल्या काही महिन्यांपासून शहरातील शिक्षक कॉलनी परिसरात राहत असल्याची माहिती नागपूर पोलिसांना (Nagpur Police) मिळाली. पोलिसांनी मध्यरात्री दोन वाजता सापळा रचला, दारापुढे पोलिस येताच त्याने माडीवरून उडी मारली आणि पळ काढून पोलिसांना चकमा दिला. एखाद्या चित्रपटाला शोभेल, असा प्रकार काल परिसरातील काहींनी अनुभवला. (Nagpur Crime News)

येथील काही युवकांशी मैत्री करून या चोरट्याने रूम भाड्याने घेतली होती. येथूनच तो चोरीचे प्लॅनिंग करीत असल्याची माहिती समोर आली. आधी तीन जण एकाच रूमवर राहत होते. मात्र काही दिवसांनी दोघे निघून गेले. परिसरातील काही मुलांशी मैत्री करून त्याने आपला संपर्क वाढविला. मोठा चोर आपल्यात राहत असल्याची कुणाला कल्पनाही त्याने येऊ दिली नाही.

परिसरात राहून येथील युवकांना पैशाची व इतर मदत करून त्यांना जवळ करण्याचा त्याचा प्रयत्न यशस्वी झाला. मात्र हे यश जास्त दिवस टिकू शकले नाही. दुसऱ्याच्या फोनवरून आपल्या साथीदारांना फोन करण्याच्या नादामुळे याची माहिती पोलिसांपर्यंत पोहोचली आणि काल नागपूर पोलिसांनी मध्यरात्री तिवसा शहर गाठले.

पोलिसांनी फोनच्या लोकेशनने शहरातील आनंदवाडी, शिक्षक कॉलनी परिसर पिंजून काढला. एका युवकाच्या घरी जाऊन फोन ताब्यात घेऊन पोलिसांनी चौकशी केली असता युवकाने त्याची माहिती दिली व पोलिसांनी त्या घराला घेरावा घातला. युवकाच्या मदतीने त्याला आवाज दिला. मात्र बाहेर पोलिस असल्याची भनक लागताच त्याने माडीवरून उडी घेत अंधारातून पळ काढला. पोलिसांनी काही तास अंधारात शोध घेतला. मात्र तो हाती न लागल्याने पोलिसांना आल्या पावली परत जावे लागले.

फोनवरून लागला सुगावा

आशिष कधीच स्वतःच्या फोनवरून आपल्या साथीदारांना फोन करीत नव्हता. येथील युवकांच्या वेगवेगळ्या फोन वापरून फोन पेच्या माध्यमातून पैसे मागवून येथील युवकांवर खर्च करून त्याने अनेकांना आपल्या जवळ केले होते. फोनवरून पैशाच्या देवाण-घेवाणीमुळे त्याचा सुगावा नागपूर पोलिसांना लागला असावा, असा अंदाज आहे.