शुद्ध श्‍वासाचा निर्माताच सापडला संकटात, शेकडो वर्षे जुना वटवृक्ष जाळून पाडण्याचा प्रयत्न

शेंबाळपिंपरी (जि. यवतमाळ) : शुद्ध हवेचा निरंतर पुरवठा करून मानवी जीवन समृद्ध करणाऱ्यांच्या नशिबी आता मानवी संकटामुळे श्‍वास घेणेच अवघड झाले आहे. त्याचे रक्षण करण्यासाठी प्रशासनाने पुढाकार घ्यावा, अशी मागणी करून चिपको आंदोलन करण्याची गावकऱ्यांनी तयारी केली आहे. या आशयाचे निवेदन गावकऱ्यांनी जिल्हाधिकारी यांना पाठविले आहे.

पुसद तालुक्‍यातील गौळ बुद्रूक गावातील हिंदू-मुस्लिम ऐक्‍याचे प्रतीक असलेल्या बाबा ओश परिसरात शेकडो वर्षे जुना वटवृक्ष आहे. या झाडावर वेगवेगळ्या पक्ष्यांचा अधिवास आहे. गावाच्या अनेक घटना व आठवणीचे प्रतीक असलेला हा वटवृक्ष अनेक वर्षांपासून गावकऱ्यांचा श्‍वास जतन करीत आहे.

नागपंचमीनिमित्त लेकीबाळींनी घेतलेले मोठ्या झोक्‍यांशिवाय सुहासिनी महिलांनी सातजन्म हाच पती मिळावा म्हणून केलेली मनोभावे पूजा, असे कितीतरी धार्मिक विधींमुळे हा वटवृक्ष गावकऱ्यांच्या जिव्हाळ्याचा विषय बनला आहे. पण मागील काही दिवसांपासून या वटवृक्षाच्या खोडाला जाळ करून पेटवून देऊन पाडून टाकण्याचा प्रयत्न केला जात आहे. विशेष म्हणजे, ग्रामपंचायत या बाबीकडे गांभीर्याने पाहत नसल्याने असा प्रकार करणाऱ्यांची हिंमत वाढली आहे. जिल्हाधिकारी यांनी या प्रकाराकडे लक्ष पुरवून वृक्षाचे रक्षण करण्यासंदर्भात कार्यवाही करावी, अशी मागणी निवेदनाद्वारे करण्यात आली आहे.

अवश्य वाचा : सोयाबीनसह धानाचे पीक पेटविले, बोंडअळीने कापसाचे नुकसान; सांगा आता कर्ज फेडायचे कसे?

अन्यथा चिपको आंदोलन करू

सह्याद्री देवराईचे सयाजी शिंदे यांनाही गावकऱ्यांनी या वृक्ष संरक्षणासाठी हाक दिली आहे. ग्रामपंचायतच्या दुर्लक्षामुळेच हा प्रकार होत असल्याचा आरोप करीत धार्मिक महत्त्व असलेल्या आणि श्‍वास जतन करणाऱ्या वटवृक्षाचे जतन करून दोषींना समज द्यावी, अन्यथा आम्ही चिपको आंदोलन करू, असा इशाराही ग्रामस्थांकडून देण्यात आला आहे. या महत्त्वपूर्ण आणि ग्रामीण जनतेच्या भावना जुडलेल्या विषयाबाबत संबंधित लोकप्रतिनिधीही दुर्लक्षित भूमिका घेत असल्याने नागरिकांमध्ये रोष आहे. यावर प्रशासन काय कारवाई करते, याकडे गावातीलच नव्हे तर तालुक्‍यातील जनतेचे लक्ष लागले आहे.

जाणून घ्या : पांढऱ्या सोन्याचा भाव गडगडला, प्रत घसरल्याचे कारण देत खासगी खरेदीदारांची टाळाटाळ

वटवृक्षाचे संवर्धन करू
सदर प्रकार हा निसर्ग व पर्यावरणाची हानी करणारा आहे. या बाबत मी उपविभागीय अधिकारी यांना माहिती घेण्यासाठी सांगितले. गावकऱ्यांशी चर्चा करून या वटवृक्षाचे संवर्धन करण्यात येईल.
- एम. डी. सिंग,
जिल्हाधिकारी, यवतमाळ

(संपादन : दुलिराम रहांगडाले)