रुग्णालयाचा गलथान कारभार, रुग्णाचे नावच नोंदविले नाही

अमरावती : एका जखमी व्यक्तीचे केसपेपर तयार होते, पण त्याचे नाव नोंदणी रजिस्टरमध्ये नव्हते. वीस तासानंतर त्या व्यक्तीचा उपचारादरम्यान इर्वीन रुग्णालयात शनिवारी मृत्यू झाला. त्यानंतरच शहर कोतवाली पोलिसांच्या हालचाली सुरू झाल्या. त्यामुळे इर्विनचा गलथान कारभार चव्हाट्यावर आला.

सुरेश पुंडलिक पेंदोर (वय ४०, रा. गांधीआश्रम, अमरावती) असे उपचारादरम्यान मृत झालेल्या व्यक्तीचे नाव असल्याचे पोलिसांनी सांगितले. शुक्रवारी सायंकाळी साडेसातच्या सुमारास इर्वीन रुग्णालयाजवळच्या भापकर कॉम्प्लेक्‍सजवळ एका जनरल स्टोअर्स समोर प्रवासी ऑटोने एका व्यक्तीला धडक दिली. जखमीस काहींनी उपचारासाठी इर्वीनमध्ये दाखल केले. त्या व्यक्तीचा केसपेपर तयार केले. परंतु रुग्णाची नोंद येथील रजिस्टरमध्ये केली नाही. नोंदीनंतर केसपेपर तयार होतात. त्यावर निदानाचा उल्लेख असतो. अपघात, हाणामारी किंवा संशयास्पद मृत्यू असल्याचे लक्षात येताच, ओपीडीमधुनच पोलिस चौकीत मेमो पाठविल्या जातो. परंतु या रुग्णाबाबत तसे काहीच झाले नाही.

वाचा - कौंडण्यपूर परिसरातून वाळूचोरीचे चार ट्रॅक्टर जप्त, तहसीलदारांनी वाळूमाफियांवर ठोठावला दंड

ओपीडीमध्ये दाखल व्यक्ती कोण हे समजायला वीस तास लागले. शनिवारी त्या व्यक्तीची प्रकृती बिघडल्याने त्याला नागपूरला हलविण्यात आले. दरम्यान, वाटेतच त्या व्यक्तीचा मृत्यू झाल्याने मृतदेह दुपारी तीन वाजून दहा मिनीटांनी इर्वीनमध्ये आणल्यावर त्यांना मृत घोषित करण्यात आले. मृत्यूनंतरच त्यांचा मेमो रुग्णालयातून चौकीत तर सायंकाळी साडेपाच वाजता ठाण्यात पोचला. त्यानंतर चौकशी सुरू झाली. मृत व्यक्तीच्या खिशात असलेले आधार कार्डावरुन त्याच्या नातेवाइकांना बोलविण्यात आले. मृत व्यक्ती सुरेश पेंदोर असल्याचे शिक्कामोर्तब झाले. या घटनेतून इर्वीन रुग्णालयाचा बेजबाबदारपणा चव्हाट्यावर आला. मृत व्यक्तीची पत्नी संगीता सुरेश पेंदोर यांनी कोतवाली ठाण्यात तक्रार केली असता, गुन्हा दाखल झाला.

रुग्णालय प्रशासनाला दिले जाईल पत्र
घटना गंभीर असल्याने शुक्रवारीच मेमो येणे अपेक्षित होते. तातडीने पोलिसांना गुन्हा दाखल करता आला असता. परंतु मेमोसाठी इर्वीनमधुनच विलंब झाला. त्यासंदर्भात रुग्णालय प्रशासनाला पत्र देऊन माहिती घेतल्या जाईल. असे पोलिस उपनिरीक्षक श्री. चाटे यांनी सांगितले.

संपादन - नरेश शेळके