सोलर कामासाठी नेमले विदर्भाबाहेरील कंत्राटदार; चंद्रपूर जिल्हा परिषदेचा प्रताप

चंद्रपूर : जिल्हा परिषदेच्या ग्रामीण पाणीपुरवठा विभाग आणि यांत्रिकी विभागाच्या माध्यमातून दरवर्षी सोलरपंप, सोलर लाइट, हायमॅक्‍स दिवे लावण्याची कामे निघतात. ही कामे देण्याबाबत एका पॅनेलची नियुक्ती करण्यात आली आहे. नियुक्त पॅनेलमध्ये मुंबई, पुणे, औरंगाबाद, जळगाव येथील कंत्राटदारांचा समावेश आहे. कामे झाल्यावर हे कंत्राटदार जिल्ह्यात फिरकतही नसल्याने देखभाल, दुरुस्तीची कामे मोठ्या प्रमाणावर पडून असल्याची माहिती आहे.

जिल्हा परिषदेच्या ग्रामीण पाणीपुरवठा विभाग आणि यांत्रिकी विभागाच्या माध्यमातून जिल्ह्यात विविध योजनांच्या माध्यमातून दरवर्षी सोलरपंप, सोलर लाइट, हायमॅक्‍स दिवे लावण्यात येतात. ही कामे देण्यासाठी जिल्हा परिषदेने एक पॅनेल नियुक्त केले आहे. त्यात चौदा कंत्राटदारांचा समावेश करण्यात आला आहे. या पॅनेलवर असलेल्या कंत्राटदारांनाच सोलर यंत्रणेशी निगडित कामे मिळतात. यातील बहुतांश कंत्राटदार हे मुंबई, पुणे, जळगाव, औरंगाबाद यासह अन्य ठिकाणचे आहेत.

अवश्य वाचा : नागपुरातील हिंगणा एमआयडीसीतील फर्निचर कंपनीला भीषण आग, परिसरात आग पसरण्याची भीती

जिल्ह्यातील केवळ दोन कंत्राटदार

चंद्रपूर जिल्ह्यातील केवळ दोनच कंत्राटदार या पॅनेलवर आहेत. या पॅनेलवर विदर्भाबाहेरील असलेल्या कंत्राटदार अनेकदा पेटी कॉन्ट्रॅक्‍ट देऊन मोकळे होतात. जिल्ह्यात येऊन कामे करणे शक्‍य नसल्याने ते दुसऱ्याच कंत्राटदारांना कामे देतात. दुसरी यंत्रणा कामे करून मोकळे होते. मात्र, जेव्हा देखभाल, दुरुस्तीची वेळ येते; तेव्हा ती कामे करीत नाही. परिणामी सोलरपंप, सोलर लाइट, हायमॅक्‍स दिव्यांच्या देखभाल, दुरुस्तीची कामे मोठ्या प्रमाणावर पडून आहेत.

निधी वाया गेल्याच्या प्रतिक्रिया

यंत्रणा दुरुस्त करण्याबाबत लोकप्रतिनिधी, जिल्हा परिषद सदस्य, ग्रामपंचायत सदस्यांकडे नागरिक तक्रारी करीत आहेत. मात्र, ही कामे मिळतात एकाला आणि करतात दुसरेच. त्यामुळे मोठ्या प्रमाणावर देखभाल, दुरुस्तीची कामे पडून आहेत. याबाबत पाणीपुरवठा विभाग, यांत्रिकी विभागाकडेही तक्रारी करण्यात आल्या. मात्र, त्याची दखल घेण्यात आली नाही. त्यामुळे या कामावर करण्यात आलेल्या निधी वाया गेल्याच्या प्रतिक्रिया आता उमटू लागल्या आहेत.

जाणून घ्या : घुग्घुसवासियांचा ग्रामपंचायत निवडणुकीवर बहिष्कार, पालिकेसाठी सर्वपक्षीय चक्काजाम

पूर्व विदर्भातील कंत्राटदारांना द्यावी कामे
दोनशे किलोमीटर परिघातील कंत्राटदारांची या पॅनेलवर नियुक्ती करणे आवश्‍यक आहे. त्यातही पूर्व विदर्भातील कंत्राटदारांना सोलरशी संबंधित कामे देण्याबाबत जिल्हा परिषदेने निर्णय घ्यावा. असे केल्यास सोलर यंत्रणेशी संबंधित कामे योग्य पद्धतीने होईल. स्थायी समितीच्या सभेत हा प्रश्‍न आपण उपस्थित करू.
- संजय गजपुरे, जिल्हा परिषद सदस्य.

(संपादन : दुलिराम रहागंडाले)