![Yavatmal](http://media.assettype.com/esakal%2F2024-06%2F839b5842-618c-481e-84b0-8b99ca6ef8a3%2FRushikesh_Salvi__42_.jpg?w=480&auto=format%2Ccompress&fit=max)
पुसद (जि. यवतमाळ) : माळपठारील रोहडा, बेलोरा, मारवाडी विद्युत विभागाच्या बीटमध्ये विजेच्या खांबावर काम करीत असताना रविवारी (ता.२३) खासगी वीज कामगाराचा विजेचा धक्का लागून जागीच मृत्यू झाला. नामदेव पांडुरंग मार्कंड ( वय ३५ वर्षे रा. बेलोरा) असे मृत वीज कामगाराचे नाव आहे.
वीज विभागाच्या लाईनमनच्या हलगर्जीपणामुळे या कामगाराचा मृत्यू झाल्याने नागरिकांनी संताप व्यक्त करीत रस्ता रोको केला. दोषींवर कारवाई करण्याची मागणी केली. रविवारी दुपारी दोन वाजताच्या सुमारास रोहडा गावच्या हद्दीत पुलाजवळ विजेचे काम करण्यासाठी नामदेव मार्कंड हा विजेच्या खांबावर चढला.
त्याला ऑपरेटरने कोणतीही पूर्व सूचना न देता वीजपुरवठा सुरू केल्याने या कामगाराला विजेचा धक्का लागून त्याचा खांबाला चिटकून जागीच मृत्यू झाला. या घटनेची माहिती मिळताच घटनास्थळी नातेवाईक व परिसरातील नागरिकांनी गर्दी करून मारवाडी फाट्यावर रास्ता रोको केला. मृत्यूच्या कारणाचा योग्य तपास लागल्याशिवाय मृतदेह जाग्यावरून हलविण्यास नातेवाइकांनी विरोध केला.
यावेळी खंडाळा पोलिस ठाण्याचे पोलिस निरिक्षक यांनी नातेवाइकांची समजूत काढण्याचा प्रयत्न केला. मृतदेह उपजिल्हा शासकीय रुग्णालयात शवविच्छेदनासाठी हलविण्याची विनंती केली. परंतु नागरिकांनी विरोध करीत जोपर्यंत दोषींवर कारवाई होत नाही तोपर्यंत मृतदेह हलविला जाणार नाही, असे ठणकून सांगितले.
विशेष म्हणजे यावेळी महावितरणचे कार्यकारी अभियंता किंवा उपकार्यकारी अभियंता तसेच शाखा अभियंता यांनी घटनेच्या ठिकाणी भेटसुद्धा दिली नाही. त्यामुळे नातेवाइकांनी संताप व्यक्त केला.
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.