औषध घेत नाही म्हणून पत्नीला मारलेली थापड ठरली जीवघेणी

कोरची (जि. गडचिरोली) : औषध घेत नाही म्हणून पतीने पत्नीला थापड मारली. यात पत्नीचा मृत्यू झाला. ही घटना शुक्रवारी दुपारी मुलेटीपदीकसा येथे समोर आली. सुबायबाई सुभाष दुर्वे (वय ३५, रा. मुलेटीपदीकसा) असे मृत महिलेचे नाव आहे.

पोलिसांनी दिलेल्या माहितीनुसार, सुबायबाई दुर्वे या कित्येक दिवसांपासून आजारी होत्या. तब्येत बरी होण्यासाठी वेळेवर औषध घेत नाही म्हणून रागावून पती सुभाष दुर्वे यांनी पत्नीला थापड मारली. त्यामुळे आजारी पत्नी खाली कोसळून पडली. प्रकृती अजून खालावत असल्याचे बघून सुबायबाईला ग्रामीण रुग्णालय, कोरची येथे आणण्यात आले.

परंतु, वैद्यकीय अधिकाऱ्यांनी तिला मृत घोषित केले. घटनेचा तपास सहायक पोलिस निरीक्षक विनोद गोडबोले करीत आहेत. सुबायबाईला दोन मुले व एक मुलगी आहे. तिचे शवविच्छेदन ग्रामीण रुग्णालय कोरची येथे करण्यात आले.