Maharashtra Politics News : 'तू महाराष्ट्रभर फिरणे बंद कर, नाहीतर…'; भुजबळ, मुंडेंनंतर आता राणांना धमकी

Navnit Rana Ravi Rana News : राष्ट्रवादीचे नेते छगन भुजबळ आणि धनंजय मुंडे यांनी जीवे मारण्याच्या धमक्या आल्यानंतर आता अमरावतीचे अपक्ष आमदार रवी राणा यांनी देखील फोन करून जीवे मारण्याची धमकी देण्यात आली आहे. तू महाराष्ट्रभर फिरणे बंद कर, नाहीतर तुझ्या जीवाचे काहीतरी करून टाकू... असा धमकीचा फोन रवी राणा यांना करण्यात आला आहे. दरम्यान या प्रकरणी अमरावतीच्या राजपेठ पोलीस स्टेशनमध्ये तक्रार दाखल करण्यात आली आहे.

मिळालेल्या माहितीनुसार रवी राणा यांना औरंगाबाद येथील अर्जुन लोखंडे नावाच्या व्यक्तीकडून जीवे धमकी आल्याचा आरोप आहे. तू आमच्या विरोधात कसा काय बोलतो, एवढ्या वेळेस थांब नाहीतर तुला संपवून टाकतो, अशी धमकी दिल्याचा तक्रारीत उल्लेख करण्यात आला आहे. इतकंच नाही, तर तू महाराष्ट्रभर फिरणे बंद कर... नाहीतर तुझ्या जीवाचे काही तरी करून टाकू... अचानक काही घडलं किंवा अपघात झाला तर मग म्हणू नको... अशी धमकी दिल्याचा देखील पोलीस तक्रारीत उल्लेख आहे.

राष्ट्रवादी काँग्रेसच्या फुटीनंतर अजितदादांच्या गटासोबत गेलेल्या छगन भुजबळ यांच्यानंतर धनंजय मुंडे यांना देखील धमकीचा फोन आल्यानं खळबळ उडाली होती. मुंडे यांच्या परळ येथील निवासस्थानी धमकीचा फोन करत धमकी देणाऱ्या व्यक्तीनं त्यांच्याकडं ५० लाख रुपयांची मागणी केली आहे. भुजबळ यांच्या कार्यालयात फोन करून आपल्याला सुपारी मिळाल्याचा दावा केला होता. यासंदर्भातील ऑडिओ क्लिप देखील समोर आली होती.