विदर्भात डेल्टाची धडक; अमरावती, गडचिरोली व भंडाऱ्यात आढळले रुग्ण

अमरावती : कोरोनाची दुसरी लाट थोपविल्यानंतर काहीसे दिलासादायक चित्र निर्माण झाले असतानाच पुन्हा एकदा कोरोनाच्या डेल्टा व्हेरियन्टने विदर्भात धडक दिली. अमरावती जिल्ह्यात डेल्टाचे सहा रुग्ण आढळून आल्याची बाब मंगळवारी उजेडात आली. या रुग्णांवर यशस्वी उपचार केल्याचा दावा आरोग्य विभागाकडून करण्यात येत आहे. तर गडचिरोलीतही सहा आणि भंडाऱ्यात एक रुग्ण आढळल्याने प्रशासनाला धडकी भरली आहे.

अमरावती मनपा क्षेत्रात तीन तर मोर्शी, वरुड तसेच चांदूरबाजार तालुक्यात प्रत्येकी एक रुग्ण आढळला. सर्व रुग्णांची प्रकृती स्थिर असल्याचे जिल्हा आरोग्य अधिकारी डॉ. दिलीप रणमले यांनी सांगितले. सहाही रुग्णांना यापूर्वी कोरोनाची लागण झालेली आहे. त्यांचा आरटीपीसीआर अहवाल पॉझिटिव्ह आलेला असून, डेल्टा व्हेरियन्टचा संशय असल्याने त्यांचे स्वॅब राज्यस्तरावर प्रयोगशाळा चाचणीसाठी पाठविले होते.

प्रयोगशाळेचा अहवाल प्राप्त झाल्यानंतर सहा जणांना डेल्टाची लागण झाल्याचे निष्पन्न झाले. त्यांच्यावर आतापर्यंतच्या कोरोना प्रोटोकॉलनुसारच उपचार करण्यात येत असल्याचे आरोग्य विभागाकडून सांगण्यात आले. सहा रुग्णांचे अहवाल सोमवारी प्राप्त झाल्याची माहिती जिल्हा आरोग्य अधिकाऱ्यांनी दिली. तर या रुग्णांवर यशस्वी उपचार केल्याची माहिती सुपर स्पेशालिटीमधील कोविड रुग्णालयाच्या प्रमुखांनी दिली. यासंदर्भात जिल्हा शल्यचिकित्सक डॉ. श्यामसुंदर निकम यांच्याशी संपर्क साधण्याचा प्रयत्न केला असता तो होऊ शकला नाही.

पूर्व विदर्भात धडकी

गडचिरोली जिल्ह्यात मंगळवारी सहा तर भंडारा जिल्ह्यात एका डेल्टा प्लस रुग्णांची नोंद करण्यात आली. कोरोना विषाणूच्या या नव्या रूपाचे रुग्ण सापडल्याने अधिक काळजी घेण्याची गरज निर्माण झाली आहे. जिल्ह्यात ५६९ कोरोना तपासण्यांपैकी ८ नवीन बाधित आढळून आले. भंडारा जिल्ह्यात आढळलेल्या रुग्णाच्या संपर्कातील कोणातही डेल्टा प्लसची लक्षणे दिसली नाही. भंडारा तालुक्यातील या रुग्णाच्या स्त्रावाचे नमुने जून महिन्यात तपासणीसाठी पाठविले होते.