धनगर कुटुंबाची दिवाळी शेताच्या बांधावरच 

समुद्रपूर (जि. वर्धा) : अद्यापपर्यंत परतीच्या पावसाचा धिंगाणा सुरूच असल्याने दिवाळी कधी आली अन्‌ कधी गेली कळलेच नाही. सतत येणाऱ्या पावसाने गत काही दिवसांमध्ये दाणादाण उडाली. अजूनही त्यातून आम्ही सावरलो नाही. आमच्या घरीही दिवाळीच्या चकल्या, चिवडा, लाडू, करंज्या होतात. पण, यंदा पावसाने उसंतच दिली नाही. पावसापासून बचावातच अख्खा काळ गेला. यंदाची दिवाळी आमच्यासाठी हालअपेष्टांचीच ठरली, अशी व्यथा धनगर समाजातील महिलांनी व्यक्त केली. 
तालुक्‍यातील काही भागात अनेक वर्षांपासून काही धनगर कुटूंब शेळ्या-मेंढ्यांना घेऊन येतात. ते या भागात वास्तव्य करतात. यंदा तालुक्‍यात अतिवृष्टी झाली. त्यामुळे दिवाळीसणाकरिता आपल्या गावी जाता आले नाही. या पावसामुळे शेताच्या बांधावरच राहत असलेल्या झोपड्यांमध्ये दिवाळी साजरी करावी लागली. अतिपावसामुळे शेतजमिनी ओल्या झाल्या आहेत. अनेक वेळा मेंढपाळाच्या पालांमध्ये पावसाचे पाणी शिरून त्यांच्या शेळ्या-मेंढ्या, जनावरे, लहान मुलांचे हाल झाले. दिवाळीमध्ये आम्ही पण लाडू, चिवडा इत्यादी फराळाचे करतो. परंतु, या पावसाने अक्षरक्ष: धुमाकूळ घातला आणि आमच्या आनंदावर विरजण पडले. पावसामुळे या वर्षाची दिवाळी कायम आठवणीत राहील, अशी व्यथा धनगर बांधव मांडत आहेत.