नापिकीला कंटाळून शेतकऱ्याची आत्महत्या

आष्टी : घरात अठरा विश्व दारिद्र्य, त्यात सततची नापिकी आणि यंदा झालेली अतिवृष्टीने हताश झालेल्या वृद्ध शेतकऱ्याने विहिरीत उडी घेत आत्महत्या केली. ही घटना तालुक्यातील साहूर येथे उघडकीस आली. मधुकर टीकाराम गणेसर (वय ८५) असे मृत अस्पभुधारक शेतकऱ्याचे नाव आहे. माहितीनुसार साहूर येथील अल्पभूधारक शेतकरी मधुकर टीकाराम गणेसर यांच्याकडे चार एकर कोरडवाहू शेती आहे. पत्नी, दोन मुले, दोन सुना व नातवंड असा त्यांचा परिवार. मधुकर गणेसर यांचं अगदी लहानपणापासून उभ आयुष्य कष्टात गेलं. कुटुंबासाठी ढोरमेहनत घेतली.मात्र शेतीने दगा दिला.

यंदा अतिवृष्टीने त्यात भर घातली. खासगी उधारीची परतफेड कशी करायची तसेच कुटुंबाचा दैनंदिन खर्च कसा चालवावा या विवंचनेत असताना मधुकर गणेसर घराशेजारी असलेल्या ग्रामपंचायतीच्या विहिरीत उडी घेत आत्महत्या केली. ही बाब रात्री दोन वाजता घरच्यांच्या लक्षात येतात त्यांनी शोधाशोध केली असता त्यांची काडी आणि चप्पल विहिरीजवळ पडून असल्याने त्यांनी विहिरीत आत्महत्या केली असल्याचे लक्षात आले काही गावकरीही घटनास्थळी जमले यावेळी गावकऱ्यांच्या मदतीने घरच्यांनी आष्टी पोलिस स्टेशनला माहिती दिली. माहिती मिळताच पोलिसांनी घटनास्थळ गाठून पंचनामा केला. या प्रकरणी आष्टी पोलिसात आकस्मिक मृत्यूची नोंद घेण्यात आली आहे.