Gadchiroli Rain : कर्जेली गावाला पुराचा वेढा, तिच्या जिवाला धोका; गर्भवती महिलेला रुग्णालयात पोहोचवण्यासाठी बचाव पथक आले धावून

सिरोंचा (जि. गडचिरोली) : गडचिरोली जिल्ह्यात आठवडा उलटला, तरी मुसळधार पाऊस सुरूच असून नदी, नाल्यांना पूर आल्याने नागरिकांचे प्रचंड हाल होत आहे. सिरोंचा तालुक्यातील कर्जेली नाला असाच दुथडी भरून वाहत असताना प्रसवकळा सुरू झालेल्या एका गर्भवती महिलेला रुग्णालयात पोहोचवण्यासाठी बचाव पथकाने भर पुरात बोटीतून तिला बाहेर काढले.

सोनी संतोष आत्राम (वय २६) रा. कर्जेली, ता. सिरोंचा, असे या गर्भवती महिलेचे नाव आहे. प्राप्त माहितीनुसार, सोनी आत्राम या गर्भवती मातेला आरोग्य विभागाने दिलेली प्रसूतीची तारीख २७ जुलै होती. मात्र, कर्जेली गावाला पुराचा वेढा असल्याने पूरपरिस्थितीत तिच्या जिवाला धोका होऊ नये म्हणून गावातील आशा वर्कर आणि आरोग्य सेविकेने वरिष्ठ अधिकाऱ्यांना याबाबत माहिती दिली.

या गरोदर मातेला गावातून बाहेर काढून रुग्णालयात दाखल करणे गरजेचे होते. मात्र, गाव नदी-नाल्यांनी वेढलेला असल्यामुळे प्रशासनापुढे मोठेच आव्हान उभे होते. मग तत्काळ एसडीआरएफ चमूला पाचारण करण्यात आले. या बचाव पथकाने ओसंडून वाहत असलेल्या कर्जेली नाल्यातून कौशल्याने बोट बाहेर काढत या गर्भवती मातेला रुग्णालयात दाखल केले. विशेष म्हणजे कर्जेली हे गाव सिरोंचा तालुका मुख्यालयापासून तब्बल ६४ किलोमीटर अंतरावर असून झिंगानुर प्राथमिक आरोग्य केंद्रात समाविष्ट आहे.

सिरोंचा तालुक्यातील आणि छत्तीसगड सीमेवर वसलेला हा गाव घनदाट जंगलांने व्यापला आहे. सध्या मुसळधार पावसामुळे येथील नदी-नाले तुडुंब भरून वाहत आहेत. दरवर्षी पावसाळ्यात या गावाचा संपर्क तुटत असतो. गावाचा पूर्व दिशेला इंद्रावती नदी, दक्षिण आणि उत्तरेस दोन्ही बाजूला मोठा नाला वाहतो, तर पश्चिमेस घनदाट जंगल आहे. अनेक वर्षांपासून येथे पुलाची मागणी होत असूनही अद्याप पूल बांधण्यात आला नाही. त्यामुळे या गर्भवती महिलेला असा जीवघेणा प्रवास करावा लागला.