भंडारा : पवनी तालुक्‍यातील केसलवाडा येथील शेतमजुराने शुक्रवारी, 17 जानेवारीला सायंकाळी दोन मुलींसह विहिरीत उडी घेतली. या घटनेत एका मुलीसह पित्याचा पाण्यात बुडून मृत्यू झाला, तर दुसऱ्या मुलीला वाचविण्यात गावकऱ्यांना यश आले.
अड्याळजवळील केसलवाडा येथील प्रमोद रामचंद्र बारसागडे (वय 40) याच्याकडे अर्धा एकर शेती आहे. तो मोलमजुरी करून कुटुंबाची उपजीविका चालवीत होता. त्याच्या कुटुंबात पत्नी व दोन मुली होत्या. प्रमोदला काही वर्षांपासून मानसिक आजार जडला होता, असे कुटुंबीयांनी सांगितले. शुक्रवारी सायंकाळी त्याने दोन्ही मुलींसह घरी जेवण केले. त्यानंतर दोन्ही मुलींना कडेवर घेऊन त्याने घराजवळ असलेल्या विहिरीत उडी घेतली. दोन लहान मुलींसह शेतमजुराने विहिरीत उडी घेतल्यामुळे गावकरी गोळा झाले.
कुणाल देवानंद रामटेके व गावकऱ्यांनी मिळून तिघांनाही बाहेर काढले. मात्र, तत्पूर्वीच प्रमोद आणि त्याची छोटी मुलगी सानवी बारसागडे (वय दीड वर्षे) यांचा पाण्यात बुडून मृत्यू झाला होता. शर्वरी बारसागडे (वय चार वर्षे) हिला वाचविण्यात गावकऱ्यांना यश आले. तिला अड्याळ येथील ग्रामीण रुग्णालयात दाखल केले आहे. अड्याळ पोलिसांनी घटनेची नोंद केली आहे. ग्रामीण रुग्णालयात उत्तरीय तपासणी केल्यावर पित्यासह मुलीचा मृतदेह नातेवाइकांना सोपविण्यात आला.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.