लाखनी (जि. भंडारा) : एकमेकांच्या सोबतीने जीवन जगत असताना अचानक पत्नीने साथ सोडली. आपल्या जीवनसंगिनीने साथ सोडल्याचे कळताच पतीनेही प्राण सोडले. पहाटे घडलेल्या या घटनेने गोंडसावरी हळहळली.
लाखनीपासून सात किलोमीटर अंतरावर असलेल्या गोंडसावरी गावातील ग्रामस्थांसाठी बुधवारची सकाळ दुःखद बातमी घेऊन आली. गावातील नारायणराव भोंडे (वय ८५) व फिफुलाबाई भोंडे (वय ८०) यांचे पहाटेच्या सुमारास अचानक निधन झाले. पहाटे फिफुलाबाई यांना अचानक अस्वस्थ वाटायला लागले. घरातील सदस्यांनी धावाधाव सुरू केली. मात्र, काही क्षणातच त्यांचा मृत्यू झाला.
पहाटे-पहाटे सुरू झालेल्या कुटुंबीयांच्या धावपळीमुळे नारायणरावांची झोप उघडली. आपल्या जीवनसंगिनीचा मृत्यू झाल्याचे कळताच तेही पुरते खचले. कालपर्यंत एकमेकांच्या आधाराने जगताना म्हातारपणातही हिंमत होती. मात्र, पत्नीचे निधन झाल्याचे दुःख पतीला असह्य झाले. काही वेळातच त्यांनीदेखील जगाचा निरोप घेतला.
आईपाठोपाठ वडिलांनीदेखील जगाचा निरोप घेतल्याने मुलालासुद्धा काही सुचेनासे झाले. तरीदेखील ओढवलेल्या परिस्थितीला सामोरे जात भोंडे कुटुंबीयांनी दोघांचेही सोबतच अंत्यसंस्कार पार पाडले.
गावातील वृद्ध दाम्पत्याचा सोबतच मृत्यू झाल्याच्या घटनेने गोंडसावरीतील ग्रामस्थ हळहळले. या घटनेमुळे कोणीही कामावर गेले नाही. सर्वत्र स्मशानशांतता पसरली होती.
संपादन - नीलेश डाखोरे
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.