चिखलदरा/जामली - सैन्यदलात कार्यरत मुलाला पंजाब राज्यातील जालंधर येथे सोडून वैष्णोदेवीचे दर्शन करून परत येत असताना जालंधर-पठाणकोट महामार्गावर रसालपूर येथे झालेल्या भीषण अपघातात एकाच कुटुंबातील चौघांचा मृत्यू झाला, तर दोघे गंभीर जखमी झाले आहेत. या घटनेमुळे मेळघाटातील सोलामहू गावावर शोककळा पसरली आहे.
चिखलदरा तालुक्यातील सोलामहू येथे गानूजी बेलसरे यांचा मोठा मुलगा लोकेश हा सहायक शिक्षक तर लहान मुलगा मंगेश सीमा सुरक्षा दलात (बीएसएफ) कार्यरत आहे. नातेवाइकांकडे विवाह समारंभ असल्याने तो पंधरा दिवसांच्या रजेवर आला होता. बेलसरे कुटुंब वैष्णोदेवी दर्शन व मुलाला सोडण्यासाठी ३० एप्रिलला सोलामहू येथून स्वत:च्या खासगी वाहनाने निघाले. मंगेश कर्तव्यावर हजर राहण्यासाठी जालंधरला पत्नीसह उतरला आणि परिवारातील उर्वरित सदस्य वैष्णोदेवीच्या दर्शनासाठी निघाले.
परतीच्या प्रवासावर असताना त्यांच्या कारला ट्रकने मागून धडक दिली. यात गाडीचा चुराडा होऊन गानू बेलसरे (वय ५८), लोकेश गानू बेलसरे (वय ४५), अनिषा लोकेश बेलसरे (वय ४०), निहारिका (वय ११ महिने, रा. सोलामहू) यांचा मृत्यू झाला तर श्रीराम कासदेकर (वय ४०) आणि सरस्वती कासदेकर (वय ३८) गंभीर जखमी झाले. त्यांच्यावर जालंधर येथील रुग्णालयात उपचार सुरू आहेत. या घटनेची माहिती कळताच गावावर शोककळा पसरली आहे.
जालंधर (पंजाब) येथे बीएसएफमध्ये कार्यरत मंगेश बेलसरे यांनी मला फोनवर घटनेची माहिती दिली. स्थानिक पोलिसांनी घटनेचा पंचनामा केला आहे. लवकरच जालंधर पंजाब येथून सोलामहू येथील राहत्या घरी मृतदेह आणण्यात येतील.
- केवलराम काळे, माजी आमदार, मेळघाट
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.