पुसद (जि. यवतमाळ) : शेतकरी प्रयोगशील असेल तर काळ्या मातीतून सोने उगवल्याशिवाय राहत नाही. पुसद नजीकच्या निंबी शिवारातील शिवराम शेटे यांनी दोन वर्षांपूर्वी २० गुंठ्यात लागवड केलेली १०० सिडलेस लिंबूची झाडे पिवळ्याधम्म लिंबूनी अक्षरशः लगडली आहेत. एका बहारापासून त्यांना किमान २५ ते ३० हजार रुपये उत्पन्न अपेक्षित आहे.
निंबी हे भाजीपाला उत्पादकांचे गाव आहे. कष्टाळू शेतकरी भाजीपाल्या सोबतच खरबूज, टरबूज पिकांचे उत्पादनही काढतात. शिवारातील शिवराम शेटे हे कोबी उत्पादक शेतकरी. त्यांची कोबी शुभ्र पेढ्यासारखी व ताजीतवानी. त्यामुळे बाजारपेठेत त्यांचा कोबीचा ब्रँड प्रसिद्ध आहे. त्यांची वृत्ती प्रयोगशील. कोरोना काळाचा लाभ घेत त्यांनी वाशिम रोडवरील १० गुंठ्यात भाजीपाला रोपवाटिका सुरू केली. त्याला उदंड प्रतिसाद मिळाला.
टोमॅटो, वांगी, मिरची यासोबतच ऊस व इतर पिकांचे अल्प क्षेत्रात भरघोस उत्पादन काढतात. त्यांनी दोन वर्षांपूर्वी नवीन बाजारपेठेचा मागोवा घेत वीस गुंठ्यात १०० सिडलेस लिंबूची बाग तयार केली. आता या लिंबूचा दुसरा बहार ते घेत आहेत. सध्या एकेका फांदीला लहान संत्र्याच्या आकाराची पिवळीधम्म लिंबू फळे लगडली आहेत. या लिंबूची चव आंबट गोड असून प्रत्येक फळात भरपूर रस आहे. फळांची गुणवत्ता नजरेत भरणारी आहे.
लिंबूच्या झाडांना वर्षातून तीनदा बहार येतो. सातत्याने फुला-फळांची संख्या प्रत्येक झाडावर मोठ्या प्रमाणात पाहावयास मिळते. आज रोजी एका फळ झाडावर ५० किलो लिंबू लगडलेली आहेत. उन्हाळ्यात लिंबूला चांगली मागणी असते. त्यादृष्टीने बहाराचे नियोजन करण्यात आले असून, त्यापासून चांगले उत्पन्न अपेक्षित आहे. या सिडलेस लिंबूला पंचतारांकित हॉटेल्समध्ये मोठी मागणी आहे. हॉटेल, रसवंती, बारमध्ये या लिंबूंचा वापर होतो.
सिडलेस लिंबूचे उत्पादन फायदेशीर
गावरान लिंबू पेक्षा या झाडाला पाच पट उत्पादन अधिक होते. त्यामुळे सिडलेस लिंबूचे उत्पादन फायदेशीर आहे. या क्षेत्रातील कंपनी या लिंबूपासून सायट्रिक ॲसिड तयार करीत असल्याने लिंबूची मागणी चांगली आहे. शेतकऱ्यांनी मार्केटचा अभ्यासपूर्ण शोध घेऊन विक्री केल्यास अधिक फायदा होऊ शकतो.
- शिवराम शेटे, शेतकरी
सिडलेस लिंबूची झाडे निरोगी असून, ठिबकद्वारे सिंचन व्यवस्था केली आहे. तसेच शेणखताचा वापर केल्याने त्यांच्या बागेतील सेंद्रिय लिंबू रसदार व चवदार आहे. भाजीपाला शेतीला कमी क्षेत्रातील लिंबू बागेने त्यांच्या आर्थिक नियोजनाला बळ मिळाले आहे. सध्या विक्री व्यवस्था स्थानिक व बाहेरील बाजारपेठेत केलेली आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.