खापा : सावनेर तालुक्यातील खापा परिसरात गेल्या काही दिवसांपासून बिबट्याने धुमाकुळ घातला आहे. या बिबटाने नंदापूर व कोदेगांव परिसरातील शेतकऱ्यांच्या वासरांवर हल्ला करून ठार केल्याच्या घटना उघडकीस आल्या आहेत. नागरिकांमध्ये भीतीचे वातावरण निर्माण झाले असून यात शेतकऱ्यांचे मोठे आर्थिक नुकसान होत आहे. वनविभागाने परिसरात फिरत असलेल्या या बिबट्याचा शोध घेऊन त्वरित बंदोबस्त करावा, अशी मागणी खापा परिसरातील नंदापूर व कोदेगांव येथील नागरिकांनी केली आहे.