लग्नाचे आमिष दाखवून केले महिलेचे शोषण, परंतु ऐनवेळी घेतली ही भूमिका 

अमरावती : एक 35 वर्षीय महिला आपल्या 14 वर्षांच्या मुलासह पतीपासून वेगळी राहत असताना सोशल मीडियावरून तिचे एका युवकासोबत सूत जुळले. त्यानेही तिला लग्नाचे आमिष दाखवून, तिचा लैंगिक छळ केला. परंतु, ज्यावेळी प्रत्यक्ष बोहल्यावर चढण्याची वेळ आली तेव्हा त्याच्या गळ्यात वरमाला टाकणारी दुसरीच निघाली. 

विशाल बाबू साठे (वय 32, रा. चुरणी) या युवकाविरुद्ध गाडगेनगर ठाण्यात अत्याचाराचा गुन्हा दाखल झाला. तो अद्याप पसार आहे. पीडित महिला मुलासोबत 2016 पासून भाड्याच्या खोलीत राहत होती. मोबाईलवरून फेसबुक चॅटिंग करत असताना ती विशालच्या प्रेमात पडली. तोही तिच्या भेटीसाठी अमरावतीत येऊन, तिच्याशी हितगूज करीत होता. सोशल मीडियावर जुळलेल्या प्रेमामुळे लग्न करण्याचे आमिष विशालने महिलेस दाखविले. 

क्लिक करा - "ते' दृष्य पाहून मजुराची गेली तळपायातली आग मस्तकात, केली शेतमालकाची हत्या, काय होते कारण...
 

तिच्याशी शारीरिक संबंध ठेवले. एवढ्यावरच तो थांबला नाही तर त्याने आपल्या विवाहित प्रेयसीकडून पैसेही उकळले. 7 जून 2020 रोजी आठवड्यानंतर परत येतो. त्यानंतर लग्न करू, असा निरोप देऊन त्याने एका मुलाची आई असलेल्या विवाहितेची साथ सोडली.

चिखलदरा तालुक्‍यातील गावी जाऊन दुसऱ्याच युवतीसोबत लग्न केले. त्यानंतर विशालने 16 जून रोजी त्याच्या स्वत:च्या फेसबुकवर लग्नाचा फोटो टाकला. हा फोटो बघून पारा चढलेली महिला त्याच्या चिखलदरा तालुक्‍यातील गावी पोचली. 

चौकशी केली असता, ज्याच्यावर तिने विश्वास टाकला, त्याने तिची साथ सोडून दुसरीसोबत लग्न केल्याची अमरावतीच्या महिलेची खात्री पटली. त्यामुळे तिने थेट गाडगेनगर ठाण्यात तक्रार केली. पोलिसांनी विशालविरुद्ध शुक्रवारी (ता. 19) अत्याचाराचा गुन्हा दाखल केला. विशाल यास अटक झाली नसल्याचे पोलिस निरीक्षक मनीष ठाकरे यांनी स्पष्ट केले.