Mahayuti: महायुतीच्या समन्वयकांच्या यादीने खळबळ, वाचा कोणा कोणाची आहेत नावं?

आगामी विधानसभा निवडणुकीसाठी महायुतीने आज त्यांच्या विधानसभानिहाय समन्वयकांची यादी जाहीर केली. त्यात बडनेरा मतदारसंघाच्या भाजप समन्वयकपदी आमदार रवी राणा यांची नियुक्ती करण्यात आल्याने राजकीय क्षेत्रात चांगलीच खळबळ उडाली आहे.

महायुतीच्या भाजप, शिवसेना (शिंदे गट) व राष्ट्रवादी काँग्रेसच्या (अजित पवार गट) विधानसभानिहाय समन्वयकांची एकत्रित यादी बुधवारी (ता. आठ) जाहीर करण्यात आली. बडनेरा मतदारसंघाच्या भाजपच्या समन्वयकपदी आमदार रवी राणा, शिवसेनेचे रोशन मातकर व राष्ट्रवादीचे अविनाश मार्डीकर यांना स्थान देण्यात आले आहे. अमरावती मतदारसंघात भाजपकडून जयंत डेहनकर, शिवसेनेकडून जगदीश गुप्ता तर राष्ट्रवादीचे प्रशांत डवरे समन्वयक राहणार आहेत.

.

आमदार रवी राणा यांच्यावर ही जबाबदारी टाकण्यात आल्याने भाजपचे पदाधिकारी तसेच कार्यकर्तेसुद्धा बुचकळ्यात पडले आहेत. रवी राणा हे भाजपचे सदस्यसुद्धा नाहीत, अशा स्थितीत त्यांच्यावर ही जबाबदारी कशी सोपविण्यात आली, ते भाजपचे उमेदवार राहतील काय, असे प्रश्न यानिमित्ताने निर्माण झाले आहेत. ऐन निवडणुकीच्या काळात या यादीमुळे सारेच संभ्रमात असून कोणताही नेता अधिकृत प्रतिक्रिया देण्यासाठी तयार नाही.

दुसरीकडे जगदीश गुप्ता हे भाजपचे ज्येष्ठ नेते असताना ते शिवसेनेकडून समन्वयक कसे, असा सवाल करण्यात येत आहे. दरम्यान, धामणगाव रेल्वे मतदारसंघात भाजपच्या समन्वयकपदाची जबाबदारी रावसाहेब रोठे, शिवसेनेचे अंकुश खाकरे, तर राष्ट्रवादीची जबाबदारी दुर्गाबक्षसिंह ठाकूर यांच्यावर सोपविण्यात आली आहे. तिवस्यात भाजपची जबाबदारी नितीन गुडधे, शिवसेनेची अजय पांडे, तर राष्ट्रवादीची जबाबदारी अजय अग्रवाल यांच्यावर आहे. दर्यापूर विधानसभेची भाजपची जबाबदारी माणिकराव मानकर यांच्यावर तर शिवसेनेची गोपाल अरबट व राष्ट्रवादीची प्रशांत ठाकरे यांच्यावर आहे.

मेळघाटात भाजपचे रितेश नवले, शिवसेनेचे मंगल धुर्वे, तर राष्ट्रवादीचे रोहीत पाल समन्वयक म्हणून जबाबदारी सांभाळणार आहेत. अचलपूर विधानसभेच्या समन्वयकपदाची जबाबदारी भाजपचे प्रमोद कोरडे, शिवसेनेचे भूषण नागे व शिवसेनेचे प्रवीण भुजाडे यांच्यावर आहे. मोर्शी विधानसभेच्या समन्वयकाची जबाबदारी भाजपचे अॅड. शशिकांत उमेकर, शिवसेनेचे निशांत हरणे व राष्ट्रवादीचे नीलेश मगरदे यांच्यावर असल्याचे या यादीत नमूद करण्यात आले आहे