हृदयद्रावक! उपचाराअभावी कोरोनाग्रस्तानं प्रवासी निवाऱ्यात तडफडून सोडले प्राण; ब्रह्मपुरीतील घटना

ब्रह्मपुरी (चंद्रपूर) : शहरातील ख्रिस्तानंद चौकातील दवाखान्यालगत असलेल्या बसस्थानकाच्या प्रवासी निवाऱ्यात एका कोरोनाबाधिताचा उपचाराअभावी मृत्यू झाला. ही घटना रविवारी (ता. १८) सकाळच्या सुमारास उजेडात आली. मृताचे नाव गोविंदा बळीराम निकेश्‍वर (वय ५०, रा. आंभोरा, जि. नागपूर) असे आहे.

गोविंदा निकेश्‍वर हे मूळचे भिवापुरातील आहेत. त्यांना काही दिवसांपूर्वीच कोरोनाची लागण झाली होती. त्यांना भिवापूर येथील प्राथमिक आरोग्य केंद्रात भरती करण्यात आले होते. एक-दोन दिवस तिथेच त्यांच्यावर उपचार सुरू होते. मात्र, श्‍वास घेताना त्यांना त्रास जाणवू लागला. प्राथमिक आरोग्य केंद्रात ऑक्‍सिजनची व्यवस्था नव्हती. त्यामुळे शुक्रवारी (ता. १७) रात्री रुग्णवाहिकेने गोविंद निकेश्‍वर यांना ब्रह्मपुरीतील ख्रिस्तानंद हॉस्पिटलमध्ये आणण्यात आले. मात्र, तेथे अगोदरच पंचेवीस रुग्ण असल्याने निकेश्‍वर याला भरती करून घेण्यात आले नाही.

त्यानंतर निकेश्‍वर यांच्या नातेवाइकांनी शहरातील अन्य दवाखानेही बघितले. मात्र, त्यांची कोणतीच सुविधा होऊ शकली नाही. त्यामुळे ते ख्रिस्तानंद चौकात असलेल्या प्रवासी निवाऱ्याजवळच थांबले. त्यावेळी निकेश्‍वर यांची पत्नी, आईवडील आणि काही नातेवाईक होते. रात्रभर निकेश्‍वर आणि त्यांचे नातेवाईक प्रवासी निवाऱ्याजवळ थांबून होते.

रविवारी सकाळी एक रुग्ण उपचारासाठी प्रवासी निवाऱ्यात तडफडत पडला असल्याचे काही लोकांना दिसले. याची माहिती नागरिकांनी तहसीलदार विजय पवार यांना भ्रमणध्वनीवर दिली. माहिती मिळताच तहसीलदार, उपविभागीय अधिकारी क्रांती डोंबे घटनास्थळी दाखल झाल्या. घटनेचे गांभीर्य लक्षात घेत उपस्थित अधिकाऱ्यांनी लगेच जवळच्या ख्रिस्तानंद रुग्णालयातील रुग्णवाहिका व डॉक्‍टरांना बोलावून घेतले. सदर रुग्णाला कुठे भरती करता येईल काय, याबद्दल माहिती घेण्यास सुरुवात केली. डॉक्‍टर येण्याअगोदरच रुग्णाचे निधन झाले.

संपादन - अथर्व महांकाळ