पोटाची खळगी भरण्यासाठी जंगलात गेला, दबा धरून बसलेला वाघ दिसला अन् सर्वच संपलं

चंद्रपूर : जंगलात मोहफूल वेचताना वाघाने हल्ला करून एकाला ठार केले. ही घटना सिंदेवाही तालुक्‍यातील शिरकाळा येथे शनिवारी (ता. ३) सकाळच्या सुमारास उघडकीस आली. श्रीधर आत्राम, असे मृत व्यक्तीचे नाव आहे. 

हेही वाचा - कोरोनाचे ‘सुपर स्प्रेडर’ बघायचे? चला नागपूरला; उपराजधानीतील बाजारात लोकांचा बेदरकारपणा

ग्रामीण भागात सध्या मोहफूल वेचण्याचा हंगाम सुरू आहे. मोहफूल वेचण्यासाठी पहाटेच्या सुमारास अनेक नागरिक जात असतात. सिंदेवाही तालुक्‍यातील शिरकाळा येथील श्रीधर आत्राम हे नेहमीप्रमाणे काही नागरिकांसोबतच गावालगतच्या जंगलात मोहफूल वेचण्यासाठी गेले होते. मोहफूल वेचत असताना झुडुपात दबा धरून बसलेल्या वाघाने त्यांच्यावर अचानक हल्ला केला. या हल्ल्यात त्यांचा घटनास्थळीच मृत्यू झाला. 

हेही वाचा - बापरे! सात लाखांच्या दरोड्याचा छडा लावतानाच पोलिसांनी जप्त केले २ किलो ८०० ग्रॅम सोन

वाघाने हल्ला केल्यानंतर आरडाओरड झाल्यामुळे परिसरातील नागरिकांनी घटनास्थळाकडे धाव घेतली. त्यानंतर वाघाने तेथून धूम ठोकली. या घटनेची माहिती गावकऱ्यांना देण्यात आली. वनविभागालाही माहिती देण्यात आली. वनाधिकाऱ्यांनी घटनास्थळ गाठून पंचनामा केला. वनविभागाकडून आर्थिक मदत देण्याची मागणी गावकऱ्यांनी केली आहे.