Gadchiroli Maoist : विकास जेट्टीच्या अटकेने माओवादी चळवळ बॅकफूटवर

गडचिरोली - महाराष्ट्र आणि छत्तीसगड राज्याच्या सीमावर्ती भागात माओवादी चळवळ चालवत धुमाकूळ घालणारा जहाल नक्षलवादी विकास ऊर्फ सैनू मुन्शी जेट्टी (वय-४०) याला छत्तीसगडमध्ये गुरुवार (ता. २९) अटक झाल्याने माओवादी चळवळ बॅकफूटवर आल्याचे दिसून येत आहे..दोन्ही राज्यांत माओवादी चळवळीच्या माध्यमातून हिंसक कारवाया करणारा विकास जेट्टीवर दोन्ही राज्यांचे मिळून २४ लाखांचे बक्षीस होते. प्रकृती बिघडल्याने विकास जेट्टी छत्तीसगड राज्यातील जगदलपूरकडे जात असताना फरसेगड पोलिसांनी त्याला पकडले. विशेष म्हणजे ही कारवाई नॅशनल पार्क परिसरात करण्यात आली.तो मूळचा भामरागड तालुक्यातील पिडमिली येथील रहिवासी असून सदस्य ते दलम कमांडर असा त्याचा माओवादी चळवळीतील प्रवास आहे. पोलिसांनी अटक केली तेव्हा त्याच्याकडे ८० हजार रुपये, माओवादी साहित्य व औषधे आढळून आली. महाराष्ट्र, छत्तीसगड आणि तेलंगणा या तिन्ही राज्यांत तो सक्रिय होता..गडचिरोली जिल्ह्यात त्याच्यावर २५ पेक्षा अधिक गुन्हे, तर छत्तीसगडमध्ये ८ गुन्हे दाखल आहेत. छत्तीसगड शासनाने त्याच्यावर ८ लाख, तर महाराष्ट्र शासनाने १६ लाख असे एकूण २४ लाख रुपयांचे बक्षीस जाहीर केले होते. त्याच्या संपर्कात असणारेसुद्धा चौकशीच्या फेऱ्यात अडकण्याची शक्यता आहे. गडचिरोली व छत्तीसगड पोलिसांच्या तो रडारवर होता. त्याच्या चौकशीतून माओवाद्यांच्या पुढील डावपेचांची माहिती मिळणार आहे.गडचिरोलीच्या अहेरी, सिरोंचा आणि भामरागड तालुक्यांत अहेरी - भामरागड दलममार्फत माओवादी कारवाया करतात. या दलमवर देखरेख ठेवण्यासाठी विभागीय समितीचा वरिष्ठ सदस्य म्हणून विकास जेट्टीला नियुक्त करण्यात आले होते. भामरागड तालुक्यातील कोठी पोलिस ठाण्याच्या हद्दीतील विकास हा २००६मध्ये माओवादी संघटनेत दाखल झाला. गट्टा दलममधून त्याला दोन वर्षांतच कंपनी ४ मध्ये पाठविण्यात आले..२०११ मध्ये प्लाटून ७ चा कमांडर, २०१४ मध्ये प्लाटून १४ चा कमांडर म्हणून बढती देण्यात आली. २०१९ मध्ये अहेरी दलम कमांडर, तर २०२१ पासून माओवाद्यांच्या विभागीय समितीचा सदस्य झाला. २०१७ मध्ये कसनासूर - बोरियाच्या चकमकीतून तो सुरक्षित निसटला होता. यानंतर भामरागड तालुक्यासह पेरमिली, दामरंचा, जिमलगट्टा, उमानूर, पातागुडम, झिंगानूर परिसरातील माओवाद्यांच्या हालचालींचा सूत्रधार झाला.मागील वर्षी वनविभागाच्या कापेवंचा येथील पथकावर हल्ला करून वनपरिक्षेत्र अधिकाऱ्यासह त्याने काही कर्मचाऱ्यांना मारहाण केली होती. सोबतच त्यांची वाहने पेटवून मोबाइलही पळविले होते. सीमावर्ती भागात हिंसक घटना घडवून विकास छत्तीसगडच्या इंद्रावती नॅशनल पार्कच्या अभयारण्यात वास्तव्याला जात होता. याच परिसरात असताना त्याची प्रकृती ढासळली. त्याला जगदलपूरला नेण्याचा निर्णय घेण्यात आला..याविषयीची माहिती बिजापूर पोलिसांना मिळाली. त्यांनी सापळा रचून भटपल्ली गावाजवळ त्याला अटक केली. काही दिवसांपूर्वीच ही कारवाई करण्यात आली. याविषयीची अधिकृत घोषणा मात्र गुरुवारी करण्यात आली. त्याच्या अटकेने दक्षिण गडचिरोलीतील माओवादी चळवळीला मोठाच धक्का बसला आहे. दरम्यान विकास जेट्टीच्या अटकेने माओवाद्यांच्या हिंसक कारवायांना आळा बसेल, असा विश्वास गडचिरोलीचे जिल्हा पोलिस अधीक्षक नीलोत्पल यांनी व्यक्त केला आहे..वळवळणारे शेपूट...पूर्वी कधीही आपला हिंसक फणा काढणारी माओवादी चळवळ आता बरीच कमकुवत झाली आहे. पण माओवादाचा नाग ठेचला जात असतानाही त्याचे शेपूट अद्याप वळवळतच आहे. आतापर्यंत पोलिस दलाने अनेक मोठे माओवादी टिपले, तर काहींनी आत्मसर्पण केले आहे. आता विकास जेट्टीसारखा मोठा माओवादी पोलिसांच्या पंज्यात फसल्याने त्याच्याकडून मिळणारी माहिती महत्त्वाची ठरणार आहे. त्याच्याकडून मिळालेल्या माहितीच्या आधारे माओवाद्यांचे वळवळणारे शेपूट संपवता येईल, अशी आशा व्यक्त होत आहे..ब्रेक घ्या, डोकं चालवा, कोडे सोडवा!Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Gadchiroli Maoist : विकास जेट्टीच्या अटकेने माओवादी चळवळ बॅकफूटवर

Related Stories