MLA Devendra Bhuyar : आमदार भुयार यांचे वादग्रस्त वक्तव्य, महिलांचा अपमान केल्याचा आरोप

वरुड : मोर्शी-वरुड मतदारसंघाचे आमदार देवेंद्र भुयार यांनी महिलांबाबत वादग्रस्त वक्तव्य केल्याचा आरोप होत असून विरोधकांनी त्यांचा चांगलाच समाचार घेतला आहे. त्यामुळे राज्यात या विषयाचे पडसाद उमटण्याचे संकेत आहेत.

मुलगी जर पाहायला चांगली असेल तर ती तुमच्या माझ्या सारख्याला मिळत नाही. ती नोकरीवाल्या मुलालाच मिळते. दोन नंबरची डोंबळी मुलगी पानटपरी, किराणा दुकानदाराला मिळते. तीन नंबरचा गाळ जो राहिला तो शेतकऱ्याच्या पोट्ट्याला भेटते. जन्माला येणार जे लेकरू आहे ते हेंबाळ निघत राहते.

माय इल्लू पिल्लू त्याच्या पोटी वानरांचे पिल्लू, असाच कार्यक्रम आहे असे वक्तव्य आमदार देवेंद्र भुयार यांनी एका ठिकाणी केले. त्यामुळे त्यांनी महिलांचा अपमान केल्याचा आरोप होत आहे. विशेष म्हणजे, आमदार देवेंद्र भुयार हे अजित पवार यांचे समर्थक असल्याने विरोधकांनी या मुद्द्यावर देवेंद्र भुयार यांच्यावर तीव्र टीका केली आहे.

दरम्यान, काँग्रेसच्या ज्येष्ठ नेत्या तसेच अमरावतीच्या माजी पालकमंत्री अॅड. यशोमती ठाकूर यांनी आ. भुयार यांच्या या वक्तव्यावर तीव्र नाराजी व्यक्त केली आहे. ज्याठिकाणी अजित पवार यांचा लाडक्या बहिणीचा कार्यक्रम होतो, त्याच ठिकाणच्या आमदारांचा महिलांकडे बघण्याचा दृष्टिकोन कसा आहे, हे दिसून येते.

महिला ही जननी आहे, तुम्ही त्याचे वर्गीकरण करू शकत नाही, ती संसार चालवत असते. महिलांच्या मतासाठी तुम्ही जीवाचं रान करीत आहात व दुसरीकडे महिलांचे वर्गीकरण करून महिलांचा अपमान करीत आहात. त्यामुळे तुमची मानसिकता काय आहे ते समजत आहे, अशा शब्दांत यशोमती ठाकूर यांनी देवेंद्र भुयार यांचा समाचार घेतला.

अजित पवार आणि सत्ताधाऱ्यांनी त्यांच्या आमदारांना नियंत्रणात ठेवावं, अशाप्रकारे महिलांचे वर्गीकरण कोणीही खपवून घेणार नाही. तुम्हाला संसार आणि समाज धडा शिकविल्याशिवाय राहणार नाही.

-अॅड. यशोमती ठाकूर, आमदार, तिवसा.

मी शेतकऱ्यांची कैफियत मांडली. हा व्हिडिओ मध्य प्रदेशातील मुलताई येथील एका शेतकरी मेळाव्यातील आहे. विरोधक जुने व्हिडिओ काढून विपर्यास करत आहे. केवळ राजकीय द्वेषातून हा व्हायरल केला गेला आहे. तरी माझ्या सदर विधानांनी माझ्या माय मावळ्यांचे मन दुखावले असेल तर मी दिलगिरी व्यक्त करतो.

-देवेंद्र भुयार, आमदार.