कोरोनाच्या संकटातही अचलपूरच्या उपजिल्हा रुग्णालयात उमलले जीवन! एक हजारावर बालकांचा जन्म

अचलपूर(जि. अमरावती) : जन्म आणि मृत्यू कोणाच्याही हातात नाही. कोरोनामुळे सारे जग मृत्यूच्या सावटात असतानाही जन्म सोहळेही सुरूच होते. आरोग्य यंत्रणा कोरोनाला रोखण्यात व्यस्त असली तरी बाळंतपणाचे कर्तव्यही या काळात डॉक्‍टर आणि आरोग्य यंत्रणेने चोख पार पाडले. आणि कोरोनाच्या संकटातही अचलपूरच्या उपजिल्हा रुग्णालयात तब्बल एक हजारावर बालकांनी जन्म घेतला.

ग्रामीण भागातील प्राथमिक आरोग्यकेंद्रांनी आपली जबाबदारी पार पाडली. या तीन महिन्यांच्या लॉकडाऊनच्या काळात या रुग्णालयात 1 हजार 150 बालकांनी जन्म घेतला आहे.

देशासह राज्यात लॉकडाउन घोषित झाल्यानंतर अचलपूर उपजिल्हा रुग्णालयात एप्रिल ते जून या तीन महिन्यांत तब्बल 636 महिलांची प्रसूती करण्यात आली. आणि ग्रामीण भागातील आरोग्याचा कणा असलेल्या प्राथमिक आरोग्यकेंद्रातसुद्धा या तीन महिन्यांत 514 प्रसूती झाल्या आहेत.

जगभरात कोरोनाने थैमान घातले आहे. महाराष्ट्रात कोरोनाबाधितांची संख्या सर्वाधिक आहे. कोरोनाचा प्रादुर्भाव नियंत्रणात आणण्यासाठी संपूर्ण भारतासह महाराष्ट्रात विविध चार टप्प्यांत लॉकडाउन घोषित करण्यात आले आहे. दरम्यानच्या काळात आरोग्ययंत्रणेवर प्रचंड ताण पडलेला आहे. सद्यस्थितीत प्रशासनाने दिलेल्या निर्देशानुसार बाह्यरुग्ण विभागासह काही आरोग्यसेवा तात्पुरत्या थांबविल्या आहेत. मात्र उपजिल्हा रुग्णालयातील प्रसूती विभाग हा सुरुवातीपासून सेवा देत असून अखंडपणे कार्यरत आहे.

सविस्तर वाचा - मोहम्मदने यू ट्यूबचा आधार घेत मिळविले प्रेरणादायी यश

तालुक्‍यासह मेळघाटातील सर्वसामान्य वर्गातील महिला, गरोदर महिला या उपचारासाठी तसेच प्रसूतीसाठी उपजिल्हा रुग्णालयात तथा प्राथमिक आरोग्यकेंद्रात मोठ्या संख्येने दाखल होत असतात. सध्या कोरोनाचे संकट असतानाही उपजिल्हा रुग्णालयासह तालुक्‍यात कार्यरत असलेले डॉक्‍टर, कर्मचारी अविरतपणे आपली सेवा बजावत आहेत. त्यांच्या या संकटकालीन परिस्थितीत दिलेल्या सेवेमुळे तीन महिन्यांच्या काळात 1 हजार 150 बालकांनी जग पाहिले आहे.