१५ वर्षीय मुलगी ५ महिन्यांची गर्भवती; प्रियकराविरुद्ध गुन्हा

नागपूर : पानठेलाचालक युवकाने १५ वर्षीय मुलीला जाळ्यात ओढून सलग चार महिने बळजबरीने शारीरिक संबंध प्रस्थापित केले. त्यातून ती पाच महिन्यांची गर्भवती झाली. त्यानंतर मात्र युवकाने तिला घरात कोंडून ठेवले. याप्रकरणी पाचपावली पोलिसांनी बलात्काराचा गुन्हा दाखल करून युवकाला अटक केली आहे. इस्लाम खान नासीर खान (वय २१, रा. कसानपुरा, हंसापुरी) असे युवकाचे नाव आहे.

पोलिसांनी दिलेल्या माहितीनुसार, १५ वर्षीय मुलगी मूळची अकोला जिल्ह्यातील रहिवासी आहे. कामाच्या शोधात तीन वर्षांपूर्वी तिची आई तिला घेऊन नागपुरात आली. त्यांनी मोमिनपुरा परिसरात खोली भाड्याने घेतली. आई मजुरीचे काम करीत होती. आईसोबत बाजारात ये-जा करताना इस्लामसोबत तिची ओळख झाली. इस्लाम हा मोमिनपुरा परिसरात पानठेला चालवतो. यातून त्यांची मैत्री आणि मैत्रीचे रूपांतर प्रेमात झाले.

हा प्रकार आईला समजल्यानंतर विरोध केला. यामुळे मुलगी आईशी भांडू लागली. पाच महिन्यांपूर्वी ती अचानकपणे घरातून निघून गेली. आईने चौकशी केली असता ती आरोपीसोबत पाचपावली पोलिस ठाण्याच्या हद्दीतील तांडापेठ परिसरात राहात असल्याचे समजले. मुलगी आरोपीशी विवाह करण्याची मागणी करीत असताना तो टाळाटाळ करीत होता.

ती पाच महिन्यांची गर्भवती झाली व प्रकृती खालावत गेली. त्यामुळे तिला डागा रुग्णालयात दाखल करण्यात आले. तिचे वय विचारात घेता डॉक्टरांनी प्रकरणाची माहिती पोलिसांना दिली. पाचपावली पोलिस ठाण्याचे उपनिरीक्षक श्रीनिवास दराडे यांनी आईला माहिती दिली. तिच्या आईच्या तक्रारीवरून पोलिसांनी बलात्कार व बाल लैंगिक अत्याचाराचा गुन्हा दाखल करून आरोपीला अटक केली.

आंधळ्या प्रेमाने केले उद्धवस्त

१५ वर्षीय मुलगी इस्लामच्या प्रेमात पडली. इस्लामने तिचा गैरफायदा घेत वारंवार शारीरिक संबंध प्रस्थापित केले. इस्लामच्या प्रेमात आकंठ बुडालेल्या मुलीने आईशी वाद घालत आंधळ्या प्रेमासाठी घर सोडण्याची तयारी केली. इस्लामने तिला किरायाच्या रूममध्ये ठेवले. गर्भधारणेमुळे तिची प्रकृती खालावल्यामुळे इस्लामने तिच्याकडे दुर्लक्ष केले होते.