'पेढा-बर्फी नको, हिरवी नोट द्या', रुग्णालयात चिरीमिरी घेत बाळाला सोपविले जाते नातेवाईकांकडे

नागपूर : घरात नवीन पाहुणा येणार म्हणून सारे कुटुंब आनंदी असते. अशातच बाळ जन्माला आल्याची 'वार्ता' सांगण्यासाठी मावशी रुग्णालयाच्या नातेवाइकांसमोर येते. घरात मुला-मुलींच्या रूपाने नवा पाहुणा आल्यामुळे रुग्णांचे नातेवाईकही आनंदाने पेढा किंवा बर्फी 'अटेंडंट' मावशीच्या हातावर ठेवतात. मात्र, अलिकडे बर्फी पेढ्याचा गोडवा कमी झाला. पेढा-बर्फी नको, हिरव्या नोटेचा प्रसाद ठेवा, असे हळूच नातेवाईकांच्या कानात गाणं गुणगुणल्यासारखं सांगण्यात येतं. 

हेही वाचा - खुशखबर! नागपूरकरांची कोरोनाची भीती होणार दूर, उपराजधानीत लवकरच लसीकरण

शासकीय वैद्यकीय महाविद्यालय व रुग्णालय (मेडिकल)मध्ये हे चित्र दर दिवसाला अनुभवायला मिळते. मेडिकलमधील 'ओटी-जी' स्त्री व प्रसूतीरोगाशी संबंधित शस्त्रक्रियागारात बाळ जन्माला आल्यानंतर बाळ आणि बाळाच्या आईला वॉर्डात हलवण्यात येते. यावेळी मायलेकाला हलवताना बाळाची मुंह दिखाई म्हणून 'अटेंडंट'च्या हातवर पूर्वी आनंदाच्या भरात पेढा बर्फी ठेवली जात होती. येथे नातेवाईक पेढ्यांचा पॉकिटही आणून देतात. परंतु, अलिकडे लाडू, जिलबी किंवा पेढा बर्फी आणण्याच्या नातेवाइकांच्या या परंपरेला खीळ बसली आहे. आता मुलगा किंवा मुलगी झाली की, 'पेढा-बर्फी नको, हिरवी नोट द्या', अशी थेट मागणी करणारे 'अटेंडंट' मेडिकलमध्ये दिसतात. घरात मुला-मुलींच्या रूपाने नवा पाहुणा आल्यामुळे रुग्णांचे नातेवाईकही आनंदाने पाच-पन्नास नव्हे तर शंभर रुपये 'अटेंडंट'च्या हातावर ठेवतात. परंतु, ही एकप्रकारे चिरीमिरी असल्याची भावना एका नातेवाइकाने सकाळ प्रतिनिधीशी बोलताना व्यक्त केली. ही छुप्या पद्धतीने घेतली जात असलेली भेट एकप्रकारे चिरीमिरी असल्यामुळे मेडिकल प्रशासनाची प्रतिमा मलिन होत असल्याचा होत असल्याची भावना नातेवाइकांकडून अलिकडे व्यक्त होत आहे. 

हेही वाचा - प्लास्टिक उद्योग संकटात, कच्च्या मालावर दुपटीपेक्षा...

दररोज ४० बाळ येतात जन्माला - 
मेडिकलमध्ये दर दिवसाला सुमारे ४० ते ४५ बाळांचा जन्म होतो. एका बाळाच्या नातेवाइकांकडून शंभर रुपये घेतल्यास २४ तासांमध्ये ४ हजार रुपयांची चिरीमिरी घेतली जात असल्याचे गणितही या नातेवाइकाने सांगितले. अलिकडे एका हिरव्या नोटेने भागात नाही तर सोबतीला निळी नोट द्या, अशीही मागणी होत असल्याचे सांगण्यात येते. विशेष असे की, स्त्री व प्रसूती रोग वार्डात ड्युटी लावून घेण्यासाठी अर्थकारण गुंतले असल्याची जोरदार चर्चा येथे आहे. यासंदर्भात मेडिकलचे वैद्यकीय अधीक्षक यांच्याशी संपर्क साधला असता, यासंदर्भात चौकशी करण्यात येईल, असे ते म्हणाले.