Loksabha Election 2024: उमेदवारांचा सर्वांना जय श्रीराम! सायंकाळी प्रचारतोफा थंडावणार, आता लक्ष मतदानाकडे

Loksabha Election 2024 Vidarbha:

रामनवमीचा दिवस प्रचाराचा शेवटचा दिवस असल्याने सर्वांना जय श्रीराम केल्यानंतर बुधवारी (ता.१७) सायंकाळी गेल्या महिनाभरापासून सुरू असलेल्या प्रचारतोफा थंडावणार आहेत. त्यानंतर शुक्रवारी होणाऱ्या मतदानाकडे सर्वांचे लक्ष राहणार आहे.

सुमारे महिनाभरापासून जिल्ह्यात लोकसभा निवडणुकीच्या सभा, बैठका, प्रचार यात्रा तसेच आरोप-प्रत्यारोपांचा फैरी झडत आहेत. एकमेकांच्या विरोधात तक्रारी, आरोप-प्रत्यारोप आतापर्यंत झाले आहेत. काही उमेदवार विकासासाठी तर काही रोजगारासाठी आपल्या मते देण्याची मागणी करीत आहेत. नागपूर जिल्ह्यात पंतप्रधान नरेंद्र मोदी यांनी सभा घेतली. देशाचे संविधान बदलणार नाही अशी ग्वाही त्यांनी मतदारांना दिली.

दुसरीकडे काँग्रेसचे राष्ट्रीय अध्यक्ष मल्लिकार्जून खर्गे यांनी नागपूरच्या सभेत संविधान बदलण्यासाठी भाजपचे चारशे पारचा नारा देत असल्याच आरोप केला. प्रचाराच्या शेवटच्या टप्प्यात संविधान हाच प्रचाराचा प्रमुख मुद्दा भाजप आणि काँग्रेस या दोन प्रमुख पक्षाच्यावतीने रेटण्यात आला.

नागपूरमध्ये भाजपचे नेते, केंद्रीय मंत्री नितीन गडकरी विरुद्ध काँग्रेसचे विकास ठाकरे अशी थेट लढत होत आहे. बसपाचा अपवाद वगळता एकाही राष्ट्रीय पक्षाचा मोठा उमेदवार रिंगणात नसल्याने सर्वांचीच धाकधूक वाढली आहे. गडकरी आणि ठाकरे दररोज सकाळ आणि संध्याकाळी विधानसभानिहाय प्रचार यात्रा काढत आहेत.

रामटेकमध्ये महायुतीचे राजू पारवे आणि महाघाडीचे श्यामकुमार बर्वे अशी लढत होत आहे. वंचित बहुजन आघाडीने येथे काँग्रेसचे बंडखोर उमेदवार किशोर गजभिये यांना समर्थन जाहीर केले आहे.

शंकर चहांदे यांना उमेदवारी देऊन माघार घ्यायला लावणारे, भाजपचे बंडखोर उमेदवार शंकर चहांदे यांनी काँग्रेसमध्ये प्रवेश केला आहे. येथील लढत भाजपचे प्रदेशाध्यक्ष चंद्रशेखर बावनकुळे विरुद्ध काँग्रेसचे नेते सुनील केदार अशी झाली आहे.

मुख्यमंत्र्यांची ‘दर्शन’ यात्रा

रामटेक लोकसभा मतदारसंघाचे महायुतीचे उमेदवार राजू पारवे यांच्या प्रचारासाठी मुख्यमंत्री एकनाथ शिंदे बुधवारी रामटेक लोकसभा मतदारसंघात प्रचार यात्रा काढणार आहेत. या दरम्यान ते वाटेतील सर्व राममंदिरांना भेटी देणार आहेत. या माध्यमातून ते मतदारांसोबत संपर्क साधणार आहेत.