'किसी ट्रक ड्रायव्हर को नहीं लगता, मौत हो',चालकांनी व्यक्त केल्या भावना, नागपूर-भंडारा राष्ट्रीय महामार्गावर चक्काजाम

Tanker Driver Strike: अपघात झाल्यावर कुणाची चूक आहे हे आधी तपासणे गरजेचे आहे. पण याची शहानिशा करता ट्रकने अपघात झाल्यावर लोक आधी ट्रकचालकाला बेदम मारहाण करतात. यात अनेकांचे जीव जातात. चूक असेल तर तुरुंगात टाका, पण चूक नसतानाही आम्हालाच धारेवर धरले जाते. हे थांबायला हवे, अशी भावना व्यक्त करतानाच ‘किसी ट्रक ड्रायव्हर को नहीं लगता, मौत हो... हमारे भी परिवार हैं’असेही ट्रकचालक बोलून गेले.

सोमवारी नागपूर-भंडारा राष्ट्रीय महामार्गावर चक्काजाम आंदोलनादरम्यान ट्रकचालकांनी आपल्या व्यथा बोलून दाखविल्या. केंद्र सरकारने आणलेल्या नवीन वाहन कायद्यानुसार यापुढे अपघातास जबाबदार ट्रकचालकास १० वर्षांच्या शिक्षेची तरतूद करण्यात आली आहे.

सोबतच सात लाख रुपये दंडही आकाराला जाणार आहे. विशेष असे की, अपघात झाल्यानंतर जखमीला रुग्णालयात पोचवण्याची सक्ती या कायद्यात केली आहे. जखमीपर्यंत पोचण्यापूर्वीच लोक ट्रकचालकाला मारहाण करतात, यामुळे धास्तावलेल्या ट्रकचालकांनी या कायद्याच्या विरोधात नागपूर-भंडारा राष्ट्रीय महामार्गावर सकाळपासून चक्काजाम केला.

या कायद्यात वाहनचालकाविरोधात, खास करून ट्रक चालकांविरोधात एकतर्फी कारवाईची तरतूद करण्यात आल्याचा आरोप करण्यात आला. अपघातस्थळावर थांबल्यावर चूक नसतानाही लोक ट्रकचालकाला मारहाण करतात. यामुळेच ते पळून जातात, असे ट्रक चालकांचे म्हणणे आहे. (Latest Marathi News)