चंद्रशेखर बावनकुळे, अनिल बोंडे यांना घेतले ताब्यात; काळी दिवाळी

नागपूर : मुख्यमंत्री यांचे निवासस्थान असलेल्या रामगिरीवर काळी दिवाळी साजरी करण्यास गेलेले माजी मंत्री कृषी मंत्री अनिल बोंडे, माजी मंत्री तसेच भाजपचे प्रदेश सरचिटणीस चंद्रशेखर बावनकुळे यांच्यासह शेतकऱ्यांना ताब्यात घेऊन पोलिसांनी आंदोलकांना हुसकावून लावले.

आर्थिक संकटात असलेल्या शेतकऱ्यांची वीज कापली जात आहे. वेळेवर पंचनामे केले जात नाही. नैसर्गिक आपत्तीची मदतही दिली जात नसल्याने बोंडे यांनी रामगिरीवर काळी दिवाळी साजरी करण्याचा इशारा सरकारला दिला होता. त्यानुसार सकाळी ११ वाजताच्या सुमारे बोंडे, बावनकुळे यांच्यासह काही शेतकरी मोर्चाने रामगिरीकडे रवाना झाले. मात्र, त्यापूर्वीच पोलिसांनी त्यांना अडविले. त्यामुळे आंदोलक आणि पोलिस यांच्यात बाचाबाची व धक्काबुक्की झाली. पोलिसांनी सर्वांना ताब्यात घेऊन परिस्थिती नियंत्रणात आणली.

विदर्भ, मराठवाडा, पश्‍चिम महाराष्ट्र आणि उत्तर महाराष्ट्रात शेतकऱ्यांचे प्रचंड नुकसान झाले आहे. सोयाबीन, कापूस, तूर, धान सर्व पिके उद्वस्त झाली आहेत. मुख्यमंत्री उद्धव ठाकरे यांनी सांगितले की, आम्ही बांधावर जाऊन एकरी २५ हजार रुपये देऊ. बागायतदारांना ५० हजार रुपये प्रतिएकर देऊ. उद्धव ठाकरे तर आलेच नाहीत, पण साधे पंचनामेही केले नाहीत. पंचनामे केले नाहीत, तर मग नुकसान भरपाई मिळणार कशी मिळणार, असे बोंडे म्हणाले.

फडणवीस सरकारने एकही वीज कनेक्शन कापले नाही

ऐन दिवाळीला ४५ हजार शेतकऱ्यांचे वीज कनेक्शन कापले जात आहे. केवळ १०० रुपयांसाठी घरगुती वीज कापली जात आहे. फडणवीस सरकार असताना पाचही वर्ष एकाही शेतकऱ्यांचे वीज कनेक्शन आम्ही कापले नाही. मोगल आणि इंग्रजांपेक्षाही हे सरकार शेतकरी आणि सामान्य माणसासोबत वाईट वागत असल्याचा आरोप चंद्रशेखर बावनकुळे यांनी केला.